దేశంలో కరోనా మహమ్మారి కరాళ నృత్యం చేస్తోంది. కేసుల పరంగా తొలిస్థానంలో ఉన్న మహారాష్ట్రలో కొవిడ్ ఉగ్రరూపం దాల్చుతోంది. రికార్డు స్థాయిలో కొత్త కేసులు నమోదవుతున్నాయి. శనివారం ఏకంగా 12,822 మంది వైరస్ బారినపడ్డారు. ఇప్పటి వరకు ఒక్కరోజు కేసుల్లో ఇదే అత్యధికం. దీంతో మొత్తం కేసుల సంఖ్య 5,03,084కు చేరింది.
ఇవాళ మరో 275 మంది కరోనా రోగులు ప్రాణాలు కోల్పోయారు. రాష్ట్రవ్యాప్తంగా మరణాల సంఖ్య 17,367కు చేరింది. అయితే.. రికార్డు స్థాయిలో ఒక్కరోజే 11,082 మంది వైరస్ నుంచి కోలుకోవటం కాస్త ఊరట కలిగిస్తోంది. మొత్తం 3,38,362 మంది వైరస్ను జయించారు. ప్రస్తుతం 1,47,048 యాక్టివ్ కేసులు ఉన్నాయి.
గుజరాత్లో..
గుజరాత్లో కరోనా కేసుల సంఖ్య 70 వేలకు చేరువైంది. ఇవాళ కొత్తగా 1,101 మందికి వైరస్ నిర్ధరణ కాగా.. 23 మంది మరణించారు. మొత్తం మరణాలు 2,629కి చేరాయి. ఇవాళ ఒక్కరోజే 1,135 మంది వైరస్ నుంచి కోలుకున్నారు. ఇప్పటివరకు 52,827 మంది కోలుకొని ఇళ్లకు చేరారు.