'గాడ్సే గొడవ': కమల్​కు కోర్టు చీవాట్లు, బెయిల్

గాడ్సేపై వివాదాస్పద వ్యాఖ్యల కేసులో మక్కల్​ నీది మయ్యమ్​(ఎంఎన్​ఎం) పార్టీ అధినేత కమల్​హాసన్​ను మద్రాస్​ హైకోర్టు మందలించింది. ముందస్తు బెయిల్​ మంజూరు చేసింది. విద్వేషపూరిత భావజాలాన్ని వ్యాప్తి చేసే వ్యాఖ్యలు చేయడం సరికాదని న్యాయస్థానం హితవు పలికింది.

ప్రముఖ నటుడు, మక్కల్ నీది మయ్యమ్​(ఎంఎన్​ఎం) అధినేత కమల్​ హాసన్​కు మద్రాసు హైకోర్టు ముందస్తు బెయిల్​ మంజూరు చేసింది. గాడ్సేపై వివాదాస్పద వ్యాఖ్యల కేసులో కమల్​ తీరును తప్పుపడుతూ ఈ నిర్ణయం తీసుకుంది. రూ.10వేలు చొప్పున రెండు పూచీకత్తులతో అరవకురిచి జ్యుడీషియల్ మెజిస్ట్రేట్​ కోర్టు ముందు హాజరుకావాలని మద్రాసు​ హైకోర్టు అదేశించింది.

ద్వేషాన్ని వ్యాప్తి చేసే ప్రసంగాలు సాధారణమయ్యాయని జస్టిస్​ ఆర్​ పుగలెంధి నేతృత్వంలోని ధర్మాసనం ఆగ్రహం వ్యక్తం చేసింది. 'నిప్పుతో దీపాన్ని వెలిగించవచ్చు, అలాగే అడవినీ నాశనం చేయవచ్చు' అని వ్యాఖ్యానించింది.

"తీవ్రవాదులు, అతివాదులను మతం, జాతి, ప్రాంతం, పుట్టుక ఆధారంగా నిర్ణయించడం సరికాదు, వారి ప్రవర్తనతోనే నేరస్థులుగా మారుతారు" అని ధర్మాసనం పేర్కొంది.

ఎన్నికల ప్రసంగాలు ప్రజలు సమస్యలను తీర్చే పరిష్కార మార్గాల గురించి ఉండాలే తప్ప విద్వేషాన్ని వ్యాప్తి చేసేలా ఉండకూడదని మద్రాస్​ హైకోర్టు హితవు పలికింది. ఇలాంటి వ్యాఖ్యల కారణంగా అమాయక ప్రజలు ఇబ్బందులకు గురైన ఘటనలు గతంలో చాలా జరిగాయని గుర్తు చేసింది.

విద్వేషపూరిత ప్రసంగాలకు ప్రాధాన్యమిస్తున్న మీడియాపైనా ఆగ్రహం వ్యక్తం చేసింది మద్రాసు హైకోర్టు.

అరవకురుచిలో గతవారం ఎన్నికల ర్యాలీలో పాల్గొన్న కమల్​... "నాథురాం గాడ్సే స్వతంత్ర్య భారత తొలి హిందూ తీవ్రవాది" అని వివాదాస్పద వ్యాఖ్యలు చేశారు. ఈ వ్యాఖ్యల పై మే 14న ఎఫ్​ఐఆర్​ నమోదైంది. కమల్​ వ్యాఖ్యలపై భాజపా, అన్నాడీఎంకే నుంచి విమర్శలు వెల్లువెత్తాయి.

ఇదీ చూడండి: మీడియాకు కర్ణాటక ముఖ్యమంత్రి వార్నింగ్