'సభకు హాజరు కాకపోతే మాట్లాడనిచ్చేదే లేదు'

సాయంత్ర సమయాల్లో లోక్​సభలో ఎంపీల సంఖ్య తగ్గుతుండటంపై స్పీకర్​ ఓంబిర్లా అసహనం వ్యక్తం చేశారు. ఎక్కువ సమయం చర్చల్లో పాల్గొనాలని అన్ని పార్టీల ఎంపీలకు సూచించారు. ఇలా గైర్హాజరు అయ్యే ఎంపీలకు వారి సమయం వచ్చినప్పుడు అవకాశం ఇవ్వనని హెచ్చరించారు.

స్పీకర్​గా ఓం బిర్లా.. లోక్​సభలో కొత్త ఒరవడి సృష్టిస్తున్నారు. షెడ్యూల్​ ప్రకారం ఆ రోజు జరగాల్సిన చర్చ ముగియకుంటే మరింత సమయం నిస్సందేహంగా పొడిగిస్తున్నారు. ఈ రోజూ గ్రామీణ అభివృద్ధి, వ్యవసాయం, రైతుల సంక్షేమంపైనా చర్చ సాగుతున్న నేపథ్యంలో అర్ధరాత్రి వరకు పొడగించారు స్పీకర్.

అయితే సభ్యుల సంఖ్య తక్కువగా ఉండటం గమనించిన ఓం బిర్లా.. వారి తీరుపై మండిపడ్డారు. సభలో ఎక్కువ సమయం గడిపేందుకు ప్రయత్నించాలని సూచించారు. చర్చల్లో పాల్గొని ప్రయోజనాలు పొందాలన్నారు. సభలో ఎప్పుడూ హాజరు శాతం ఎక్కువ ఉండేలా చూడాలని ఆయా పార్టీల సభా నాయకులను ఆదేశించారు స్పీకర్.

వివిధ ప్రాంతాల నుంచి వచ్చిన సభ్యులు వారి సమస్యలు చెబుతుంటే దేశంలో ఏం జరుగుతుందనే విషయం తెలుస్తుందన్నారు. అంతటితో ఆగకుండా చరవాణి ద్వారా ఫోన్​ చేసి చర్చల్లో పాల్గొనేందుకు రావాలని కోరారు. ఇప్పుడు చర్చల్లో పాల్గొననివారికి వారు మాట్లాడే సమయంలో అవకాశం ఇవ్వనని హెచ్చరించారు బిర్లా.

ఇదీ చూడండి: సభలో హాజరుపై మంత్రులకు మోదీ క్లాస్