లోక్సభలో భాజపా సభ్యురాలు రమాదేవిపై సమాజ్వాదీ సభ్యుడు ఆజంఖాన్ చేసిన అనుచిత వ్యాఖ్యలపై లోక్సభ దద్దరిల్లింది. పార్టీలకు అతీతంగా సభ్యులందరూ ఆజంఖాన్ వాఖ్యలను వ్యతిరేకించారు. ఆజంఖాన్పై స్పీకర్ చర్యలు తీసుకోవాలని లోక్సభ ఏకగ్రీవ తీర్మానం చేసింది. అన్ని రాజకీయ పార్టీలతో సమావేశమై నిర్ణయం తీసుకుంటానని స్పష్టం చేశారు స్పీకర్ ఓంబిర్లా.
పార్టీలకు అతీతంగా ఏకమైన సభ
కేంద్రమంత్రి రవిశంకర్ ప్రసాద్.. ఆజంఖాన్ క్షమాపణ చెప్పాలని, లేదంటే ఆయనను లోక్సభ నుంచి సస్పెండ్ చేయాలని డిమాండ్ చేశారు. మహిళలను కించపరుస్తూ ఆజంఖాన్ చేసిన వ్యాఖ్యలను అందరూ ఖండిస్తుండడం ఆహ్వానించదగిన విషయమన్నారు ఆర్థికమంత్రి నిర్మలా సీతారామన్. ఆజంఖాన్పై తగిన చర్యలు తీసుకోవాలని స్పీకర్ను కోరారు.
ఆజం ఖాన్ వ్యాఖ్యలపై విరుచుకుపడ్డారు కేంద్ర మహిళా, శిశు సంక్షేమశాఖమంత్రి స్మృతి ఇరానీ.
"ఆజంఖాన్ వ్యాఖ్యలను మహిళలకు మాత్రమే పరిమితం చేయకూడదు. పురుషులు సహా సభ్యులందరికీ ఇది మాయని మచ్చ. మహిళలపై ఇష్టం వచ్చినట్లు వ్యాఖ్యలు చేసేందుకు ఇది పురుషులు మాత్రమే వచ్చే సభకాదు. ఈ విధమైన వ్యాఖ్యలు ఏ మహిళ అయినా ఎదుర్కొని పోలీసులను ఆశ్రయిస్తే తప్పకుండా న్యాయం జరిగేది. పని స్థలాల్లో లైంగిక వేధింపుల నియంత్రణ బిల్లును ఇదే పార్లమెంట్ చట్టం చేసింది. మేం ప్రేక్షకుల్లా చూస్తూ కూర్చోలేం. మంత్రిగా, మహిళా ఎంపీగా, లోక్సభ పక్షంగా చెబుతున్నాను. ఈ సభ మర్యాదను దుర్వినియోగం చేయలేరు. రాజకీయ పార్టీలకు అతీతంగా, లింగ భేదాలు వదిలి మనమంతా ఒకే స్వరం వినిపించాలి. మీరు మహిళలపై అనుచిత వ్యాఖ్యలు చేయలేరు. దానికి దూరంగా ఉండండి."
-స్మృతి ఇరానీ, కేంద్రమంత్రి
సోనియాను అన్నప్పుడు ఏంచేశారు?
మహిళలను కించపరచడాన్ని కాంగ్రెస్ పార్టీ ఆమోదించదని ఆ పార్టీ లోక్ సభాపక్షనేత అధిర్ రంజన్ చౌదరి అన్నారు. ఒకప్పుడు కాంగ్రెస్ అధినేత్రి సోనియా గాంధీని అగౌరవపరిచారని భాజపాను ఉద్దేశించి పరోక్ష వ్యాఖ్యలు చేశారు.
