దిల్లీ అల్లర్ల అంశం వరసగా రెండో రోజు పార్లమెంట్ను కుదిపేసింది. అల్లర్లపై చర్చ జరపాలన్న విపక్షాల పట్టుతో ఉభయ సభల్లో గందరగోళ వాతావరణం నెలకొంది. ఫలితంగా లోక్సభ, రాజ్యసభ రేపటికి వాయిదా పడ్డాయి.
లోక్సభలో ఇలా...
మంగళవారం సభ ప్రారంభమైన వెంటనే విపక్షాలు నిరసన చేపట్టాయి. దిల్లీ అల్లర్లపై చర్చించాలని పట్టుబట్టాయి. సభ సజావుగా సాగేలా సహకరించాలని స్పీకర్ ఓం బిర్లా కోరినప్పటికీ.. విపక్ష సభ్యుల తీరులో మార్పు కనిపించలేదు. స్పీకర్ అనుమతిస్తే అల్లర్లపై చర్చకు సిద్ధమని పార్లమెంటరీ వ్యవహారాల మంత్రి ప్రహ్లాద్ జోషి స్పష్టంచేశారు. అయినప్పటికీ విపక్షాలు శాంతించలేదు. వెంటనే చర్చ చేపట్టాలని డిమాండ్ చేశాయి. ప్లకార్డులు ప్రదర్శించాయి. దీనిపై ఆగ్రహం వ్యక్తం చేసిన స్పీకర్.. తొలుత సభను 12 గంటల వరకు వాయిదా వేశారు. తిరిగి ప్రారంభమైనా.. ఫలితం లేకపోవడం వల్ల దిగువ సభ 2 గంటలకు వాయిదా వేశారు.
2 గంటలకు సభ ప్రారంభమైనప్పటికీ.. కేంద్రానికి వ్యతిరేకంగా విపక్ష నేతలు మరోసారి నిరసనలు తెలిపారు. ఈ క్రమంలోనే కాగితాలు చింపి స్పీకర్ స్థానం వైపు విసిరారు. ఈ ఘటనపై తీవ్ర ఆగ్రహం వ్యక్తం చేస్తూ సభను రేపటికి వాయిదా వేశారు ఓం బిర్లా.
రాజ్యసభలో పరిస్థితి...
రాజ్యసభలోనూ లోక్సభ తరహా పరిస్థితులే దర్శనమిచ్చాయి. దిల్లీ అల్లర్లకు అధికార పార్టీ నేతల విద్వేష ప్రసంగాలే కారణమని ఆరోపిస్తూ.. విపక్షాలు నిరసనకు దిగాయి. విపక్ష సభ్యులతో అధికార పార్టీ నేతలు వాగ్వాదానికి దిగారు. ఈ నేపథ్యంలో ఎగువ సభ మధ్యాహ్నం 2గంటల వరకు వాయిదా పడింది.
తిరిగి ప్రారంభమైన తర్వాత కూడా.. ఫలితం శూన్యం. దీనితో సభ 3 గంటల వరకు వాయిదా పడింది. తిరిగి ప్రారంభమైన రాజ్యసభలో పరిస్థితులు కొంత మేర శాంతించాయి. అల్లర్లపై చర్చకు కేంద్రం సిద్ధమని.. సామాజిక న్యాయశాఖ మంత్రి థావర్చంద్ గెహ్లోత్ తెలిపారు. ఈ విషయాన్ని ఛైర్మన్ వెంకయ్యతో చర్చించి ఓ తేదీని ఖరారు చేస్తామని డిప్యూటీ ఛైర్మన్ హరివంశ్ నారాయణ్ సింగ్ స్పష్టం చేశారు. అనంతరం సభను రేపటికి వాయిదా వేశారు.
