పార్లమెంట్ వర్షాకాల సమావేశాలకు సమయం దగ్గర పడుతోంది. కరోనా వైరస్తో ముప్పు ఉన్నప్పటికీ కట్టుదిట్టమైన ఏర్పాట్ల మధ్య సమావేశాలు నిర్వహించనున్నారు. అయితే హాజరయ్యే ఎంపీల ఆరోగ్య విషయంలోనూ పలు జాగ్రత్తలు తీసుకుంటున్నారు. ఇప్పటివరకు ప్రతి ఒక్కరూ కరోనా టెస్టులు చేయించుకోవాలనే అంశం తెరపైకి రాగా తాజాగా హాజరులోనూ మార్పులు చేస్తున్నారు.
డిజిటల్ అటెండెన్స్..
ఈ సమావేశాల్లో లోక్సభ ఎంపీల హాజరును డిజిటల్ రూపంలో నమోదు చేయనున్నారు. నేషనల్ ఇన్ఫర్మేటిక్స్ సెంటర్(ఎన్ఐసీ) తయారు చేసిన అటెండెన్స్ రిజిస్టర్ యాప్ ద్వారా సభ్యులంతా హాజరు నమోదు చేసుకోనున్నారు. ఫలితంగా అటెండెన్స్ రిజిస్టర్పై సంతకం చేసే విధానానికి తాత్కాలికంగా చెక్ పడనుంది.
"ఈ యాప్ పార్లమెంటు పరిసరాల్లో మాత్రమే పనిచేస్తుంది. ప్రతి ఎంపీ ఫేస్ను స్కాన్ చేసి అప్లోడ్ చేస్తాం. అలా వారి హాజరును నమోదు చేస్తాం." అని ఓ సీనియర్ అధికారి పేర్కొన్నారు.
ఈ అప్లికేషన్లో డాష్బోర్డు, సాధారణ దరఖాస్తులు, హాజరు, ఈ-రిపోర్టులు, సెలవు దరఖాస్తులు వంటివి ఉంటాయి. ఇదే యాప్ను సెక్రటేరియట్ సిబ్బందికి ఉపయోగిస్తారని సమాచారం.
నవంబర్ 14 నుంచి...
పార్లమెంట్ వర్షాకాల సమావేశాలు సెప్టెంబర్ 14న ప్రారంభమై అక్టోబర్ 1న ముగియనున్నాయి. కరోనా కారణంగా తొలిసారి లోక్సభ, రాజ్యసభ సమావేశాలు వేరువేరు సమయాల్లో నిర్వహిస్తున్నారు.
సెప్టెంబర్ 14న.. దిగువ సభ ఉదయం 9 నుంచి మధ్యహ్నం 1 వరకు, ఎగువ సభ మధ్యహ్నం 3 నుంచి రాత్రి 7 వరకు జరగనుంది.
మిగతారోజుల్లో రాజ్యసభ ఉదయం 9 నుంచి మధ్యహ్నం 1 వరకు, లోక్సభ మధ్యహ్నం 3 నుంచి రాత్రి 7 వరకు నిర్వహించనున్నారు.
సమావేశాలు రోజుకు నాలుగు గంటలు మాత్రమే జరగనున్నాయి. ఇప్పటికే లోక్సభ స్పీకర్ ఓం బిర్లా, రాజ్యసభ ఛైర్మన్ వెంకయ్య నాయుడు ఏర్పాట్లను ఎప్పటికప్పుడు పర్యవేక్షిస్తున్నారు. కేంద్ర హోంశాఖ, ఆరోగ్య శాఖ, ఐసీఎంఆర్, డీఆర్డీఓ అధికారులతో చర్చిస్తున్నారు.
కరోనా నేపథ్యంలో పార్లమెంట్ సమావేశాలకు వేల సంఖ్యలో మాస్కులు, చేతి గ్లౌజులు, వందల కొద్ది శానిటైజర్ బాటిళ్లు, ఫేస్ సీల్డ్లు అందుబాటులో ఉంచనున్నారు. స్వయంచాలితంగా తెరుచుకునే డోర్లు, చేతులు తగలకుండా పనిచేసే శానిటైజర్లు, థర్మల్ స్క్రీనింగ్ వంటి ఏర్పాట్లు చేస్తున్నారు. ఎంపీలు, సిబ్బందితో పాటు సుమారు 4 వేల మందికి కరోనా పరీక్షలు చేసేందుకు తగిన ఏర్పాట్లు చేశారు.
