పాకిస్థాన్‌ మీదుగా భారత్‌లోకి మిడతల వ్యాప్తి జులై మధ్య వరకు కొనసాగే అవకాశం ఉందని 'మిడతల హెచ్చరిక కార్యాలయం'(ఎల్డబ్ల్యూఓ) సహాయ సంచాలకుడు డాక్టర్‌ కె.ఎల్.గుర్జార్ ఈటీవీ భారత్‌తో పేర్కొన్నారు. ఈ పురుగుల కారణంగా భారత్లో ఇప్పటి వరకు పంటలకు పెద్దగా నష్టం వాటిల్లలేదని తెలిపారు. ఒక్క రాజస్థాన్‌లోనే 5 శాతం మేర పత్తి పంటకు నష్టం వాటిల్లిందని చెప్పారు. రాజస్థాన్‌, మధ్యప్రదేశ్‌, ఉత్తర్‌ప్రదేశ్‌, పంజాబ్‌, మహారాష్ట్రల్లో ఈ చీడల నివారణకు చర్యలు చేపడుతున్నట్లు తెలిపారు. గతంలో గుజరాత్‌లో ఈ పురుగుల దండు వ్యాప్తి చెందిందని, ప్రస్తుతం అక్కడ వాటి ఉనికి లేదని స్పష్టం చేశారు గుర్జార్.
ఏప్రిల్‌ 30 నుంచి ఇప్పటివరకు 23 మిడతల గుంపులు దేశంలోకి వచ్చాయని, ఒక వారానికి 5 గుంపులు చొప్పున వస్తున్నట్లు గుర్తించామన్నారు గుర్జార్. వీటి అదుపునకు ప్రత్యేకంగా డ్రోన్లను వినియోగిస్తున్నట్లు పేర్కొన్నారు. ఎల్‌డబ్ల్యూఓలో ఇందుకోసం 200 మందికి పైగా పనిచేస్తున్నారని, 47 బృందాలు క్షేత్రస్థాయిలో విధులు నిర్వహిస్తున్నాయని చెప్పారు. ఖరీఫ్‌ పంట సీజన్‌ నాటికి మిడతలను అదుపు చేయకుంటే.. ఆ పంటలకు నష్టం వాటిల్లే ప్రమాదం ఉంటుందని తెలిపారు. ఈ పురుగుల కారణంగా దిల్లీ వంటి నగరాలకు ఏ ఇబ్బందీ లేదని భరోసా ఇచ్చారు. కీటకాల అదుపునకు రాత్రివేళ చేపడుతున్న చర్యలు సత్ఫలితాన్నిస్తున్నాయని, వాటి సంఖ్య క్రమంగా తగ్గుతోందని ఆశాభావం వ్యక్తం చేశారు. వాటి ముప్పు పూర్తిగా తొలగిపోయే వరకు అధికారులు, రైతులు అప్రమత్తంగా ఉండాల్సిందిగా సూచించారు.