సార్వత్రిక ఎన్నికల ఓట్ల లెక్కింపు ప్రారంభమైంది. పోస్టల్ బ్యాలెట్ల లెక్కింపు మొదలైంది. అవి పూర్తయ్యాక ఈవీఎంలో నిక్షిప్తమైన ఓట్ల లెక్కింపు జరుగుతుంది. చివర్లో వీవీప్యాట్ రసీదులతో ఈవీఎంల లెక్కలను సరిపోల్చుతారు. ఒకవేళ రెండింటికీ వ్యత్యాసముంటే వీవీప్యాట్ రసీదుల లెక్కనే పరిగణనలోకి తీసుకుంటారు. రసీదుల లెక్క ప్రక్రియ కారణంగా కొన్నిచోట్ల ఫలితాలు 4 నుంచి 5 గంటల ఆలస్యంగా వెలువడే అవకాశం ఉంది.
దేశవ్యాప్తంగా జరిగిన 542 లోక్సభ స్థానాలతో పాటు ఆంధ్రప్రదేశ్, అరుణాచల్ప్రదేశ్, ఒడిశా, సిక్కిం రాష్ట్రాల శాసనసభ ఎన్నికల ఫలితాలు నేడు వెలువడనున్నాయి. అలాగే తమిళనాడులో జరిగిన ఉప ఎన్నికల ఫలితాలు తేలనున్నాయి.
ఏడు దశల్లో ఏప్రిల్ 11 నుంచి ఈ నెల 19 వరకు జరిగిన సార్వత్రిక ఎన్నికల్లో మొత్తం 67.11 శాతం పోలింగ్ నమోదైంది. 542 లోక్సభ స్థానాల్లో 8,049 మంది అభ్యర్థులు పోటీ పడ్డారు. తొలిసారిగా వీవీప్యాట్ స్లిప్పులను ఈవీఎంలలో వచ్చిన ఓట్ల లెక్కతో సరిపోల్చనున్నారు. ప్రతి అసెంబ్లీ నియోజకవర్గంలో 5 పోలింగ్ కేంద్రాల్లో ఈ ప్రక్రియ జరగునుంది.