ప్రశాంతంగా 'సార్వత్రికం' తుది దశ పోలింగ్

సార్వత్రిక ఎన్నికల చివరి విడత పోలింగ్​ ప్రశాంత వాతావరణంలో సాగుతోంది. ఎలాంటి అవాంఛనీయ సంఘటనలు జరగకుండా ఎన్నికల సంఘం పటిష్ఠ బందోబస్తు చర్యలు చేపట్టింది. ముఖ్యమంత్రులు యోగి ఆదిత్యనాథ్​ యూపీలో, నితీశ్​ కుమార్​ బిహార్​లో ఓటు హక్కు వినియోగించుకున్నారు.​

2019 సార్వత్రిక చివరి విడత ఎన్నికలు ఈసీ పటిష్ఠ భద్రత నడుమ ప్రశాంతంగా సాగుతున్నాయి. ఓటర్లు ఉదయం నుంచే వరుస క్రమంలో నిల్చొని.. తమ అమూల్యమైన ఓటు హక్కు వినియోగించుకుంటున్నారు.

ఈ దశలో 7 రాష్ట్రాలు, ఓ కేంద్రపాలిత ప్రాంతంలోని 59 స్థానాలకు ఓటింగ్ జరుగుతోంది. 10.01 కోట్ల మంది ఓటర్లు.. 918 మంది అభ్యర్థుల భవితవ్యాన్ని నిర్ణయించనున్నారు. మొత్తం లక్షా 12 వేల పోలింగ్​ కేంద్రాలను ఏర్పాటు చేసింది ఎన్నికల సంఘం.

ముఖ్యమంత్రుల ఓటు...

చివరి విడత ప్రారంభమైన కొద్ది సేపటికే ఉత్తర్​ప్రదేశ్​, బిహార్​ ముఖ్యమంత్రులు ఓటు హక్కు వినియోగించుకున్నారు. యూపీ గోరఖ్​పుర్​లోని 246వ పోలింగ్​ కేంద్రంలో యోగి, పట్నా రాజ్​భవన్​ పాఠశాల పోలింగ్​ కేంద్రంలో నితీశ్​ ఓటేశారు.పట్నాలోనే మరో పోలింగ్​ కేంద్రంలో బిహార్​ ఉపముఖ్యమంత్రి సుశీల్​ కుమార్​ మోదీ ఓటు వేశారు.

బంగాల్ ముఖ్యమంత్రి మమతా బెనర్జీ మేనల్లుడు అభిషేక్​ బెనర్జీ.. దక్షిణ కోల్​కతా పార్లమెంటరీ నియోజకవర్గంలోని పోలింగ్​ కేంద్రంలో ఓటు హక్కు వినియోగించుకున్నారు.

మోదీ ట్వీట్​

సార్వత్రికం ఏడో విడత ప్రారంభమైన కాసేపటికే ఎన్నికలను ఉద్దేశించి ప్రధానమంత్రి నరేంద్ర మోదీ ట్వీట్​ చేశారు. ఓటర్లు భారీ సంఖ్యలో పాల్గొని పోలింగ్​ను విజయవంతం చేయాలని అభ్యర్థించారు. యువత ఎక్కువగా భాగస్వామ్యం కావాలని కోరారు మోదీ.

ఇదీ చూడండి:ప్రపంచంలో అత్యంత ఎత్తున ఉన్న పోలింగ్​ కేంద్రం ఇదే..