కాంగ్రెస్​పై పందెం వేశాడు- గుండు కొట్టించుకున్నాడు!

ఇటీవలే జరిగిన కేరళ ఉప ఎన్నికలో కాంగ్రెస్​ గెలుస్తుందని పందెం కట్టాడు ఆ పార్టీ సీనియర్​ కార్యకర్త. పార్టీ ఓడిపోయే ప్రసక్తే లేదని బల్లగుద్ది మరీ చెప్పాడు. ఒకవేళ అలా జరిగితే గుండు కొట్టించుకుంటానని వామపక్ష పార్టీ నాయకులతో శపథం చేశాడు. కానీ.. ఎన్నికల ఫలితాలు అతనికి ప్రతికూలంగా వచ్చాయి. పార్టీ ఘోర ఓటమిని చవి చూసింది. పందెం ప్రకారం ఆ కార్యకర్త గుండు కొట్టించుకున్నాడు.

కేరళ కొట్టాయం జిల్లాలో పందెం కట్టి ఓడినందుకు గుండు కొట్టించుకున్నాడు ఓ కాంగ్రెస్​ కార్యకర్త. ఇటీవలే జరిగిన పాలు నియోజకవర్గ ఉపఎన్నికలో కాంగ్రెస్​ కచ్చితంగా గెలుస్తుందని పందెం వేశాడు కుంజుమన్​. కానీ హస్తం పార్టీ ఓడింది. ఫలితంగా కుంజుమన్​ గుండు కొట్టించుకోక తప్పలేదు.

కుంజుమన్​కు షాక్​...

కేసీ కుంజుమన్ నలభై ఏళ్లుగా కాంగ్రెస్​ పార్టీ కార్యకర్తగా వ్యవహరిస్తున్నాడు. ఇటీవలే రాష్ట్రంలోని పాలు నియోజకవర్గానికి ఉపఎన్నికలు ముగిశాయి. ఈ నేపథ్యంలో కొద్దిరోజుల క్రితం తన బంధువు, వామపక్ష కార్యకర్త తనోలిల్​ బినోయితో ఓ పందెం కట్టాడు కుంజుమన్​​. తమ పార్టీ ఘనవిజయం సాధిస్తుందని.. లేకపోతే గుండు కొట్టించుకుంటానని శపథం చేశాడు.

ఆ ప్రాంతంలో 54 ఏళ్లుగా కేరళ కంచుకోటగా ఉన్న కాంగ్రెస్.. ఈసారీ గెలుస్తుందని ధీమాగా ఉన్న కుంజుమన్​కు షాక్​ ఎదురైంది. శుక్రవారం వెలువడ్డ ఎన్నికల ఫలితాల్లో కాంగ్రెస్​ ఘోర పరాజయం పాలైంది.

పందెం గెలిచిన వామపక్ష కార్యకర్త తనోలిల్​.. కుంజుమన్​ తల పూర్తిగా క్షౌరం చేయించుకోవాల్సిందేనని పట్టుపట్టాడు. నలుగురిలో పందెం కట్టినందుకు చేసేదేమి లేక కుంజుమన్​ ఇలా గుండు కొట్టించుకున్నాడు. ఈ దృశ్యాలను వామపక్ష కార్యకర్తలు వీడియో తీసి సామాజిక మాధ్యమాల్లో పంచుకున్నారు.

ఇదీ చూడండి:చంద్రయాన్​-2 నడిపింది... ఈ 'రాకెట్'​ మహిళలే