బొమ్మలపై కాదు.. పరీక్షలపై చర్చించండి: రాహుల్​

ప్రధానమంత్రి నరేంద్ర మోదీపై విమర్శలు గుప్పించారు కాంగ్రెస్​ నేత రాహుల్​ గాంధీ. మన్​కీ బాత్​లో విద్యార్థులు పరీక్షలపై చర్చించాలని కోరుకుంటే.. ప్రధాని బొమ్మలపై చర్చించారని ఎద్దేవా చేశారు.

ప్రధానమంత్రి నరేంద్ర మోదీపై మరోమారు విమర్శనాస్త్రాలు ఎక్కుపెట్టారు కాంగ్రెస్​ అగ్రనేత రాహుల్​ గాంధీ. 'మన్​ కీ బాత్'​లో నీట్​, జేఈఈ పరీక్షల గురించి ప్రస్తావించకపోవటంపై మండిపడ్డారు. మనసులో మాట కార్యక్రమంలో 'పరీక్ష పే చర్చ' చేపట్టాలని విద్యార్థులు కోరుకుంటే.. ప్రధాని అసలు విషయం వదిలి బొమ్మలపై మాట్లాడారని విమర్శించారు.

ప్రధానమంత్రి నరేంద్ర మోదీ ప్రతి నెల నిర్వహించే రేడియో కార్యక్రమం 'మన్​ కీ బాత్'​ పూర్తయిన తర్వాత ఈ మేరకు వ్యాఖ్యానించారు రాహుల్​.

" జీఈఈ-నీట్​ అభ్యర్థులు ప్రధాని మోదీ పరీక్ష పే చర్చ చేపట్టాలని కోరుకున్నారు. కానీ, ప్రధాని బొమ్మలపై చర్చించారు. మనసులో ఉన్నది కాదు, విద్యార్థుల గురించి మాట్లాడండి."

- రాహుల్​ గాంధీ, కాంగ్రెస్​ నేత

ఆదివారం జరిగిన మన్​కీ బాత్​లో ప్రపంచానికి బొమ్మల ప్రధాన కేంద్రంగా భారత్​ను మార్చాలని స్టార్టప్​లు, యువతకు పిలుపునిచ్చారు మోదీ.

నీట్​, జేఈఈ పరీక్షలు సెప్టెంబర్​లో నిర్వహించాలని ప్రభుత్వం నిర్ణయించింది. కరోనా నేపథ్యంలో పరీక్షలు వాయిదా వేయాలని విద్యార్థులతో పాటు ప్రతిపక్షాలు డిమాండ్​ చేస్తున్నాయి. సుప్రీం కోర్టుకు వెళ్లారు ఆరు రాష్ట్రాల మంత్రులు. అయితే పరీక్షలు నిర్వహించాల్సిందేనని సుప్రీం స్పష్టం చేసింది.

ఇదీ చూడండి: ప్రపంచానికి బొమ్మల హబ్​గా భారత్​: మోదీ