చుక్క మందు కోసం పక్క రాష్ట్రానికి ఈదుకుంటూ..!

చుక్క మందుతో గొంతు తడుపుకోవడం కోసం మద్యం ప్రియులు ఏం చెయ్యడానికైనా వెనకాడటం లేదు. కేరళలో కొంత మంది మద్యం కోసం నదిని దాటుకొని పక్క రాష్ట్రానికి వెళ్తున్నారు.

లాక్​డౌన్​ తెచ్చిన తిప్పలు అన్నీఇన్నీ కావు. అందరిదీ ఓ బాధ అయితే మందుబాబులది మరో బాధ. చుక్క మందు లేక అల్లాడిపోతున్నారు. మందు కోసం ఏం చేయడానికైనా సిద్ధపడుతున్నారు. ఎంతటి దూరమైనా ప్రయాణించేందుకు వెనుకాడటం లేదు. కేరళకు చెందిన కొంతమంది మద్యం కోసం నదిని దాటుకొని కర్ణాటక వెళ్తున్నారు.

మైసూర్​ హెచ్​కోట్​ తాలూకాలోని కేరళ- కర్ణాటక సరిహద్దు వద్ద మద్యం కొనేందుకు.. కేరళ వాసులు బౌలి ప్రాంతంలోని కబిని నదిలో ఈతకొట్టుకుంటూ వస్తున్నారు. లాక్​డౌన్​ కారణంగా అంతర్​రాష్ట్ర సరిహద్దు మూసేయడం వల్ల వారు ఈ మార్గాన్ని ఎంచుకున్నారు. ఇది చూసిన స్థానికులు తమ మొబైల్​లో చిత్రీకరించారు.

గ్రామంలోకి కేరళవాసులు అక్రమంగా ప్రవేశించడాన్ని అడ్డుకోవాలని స్థానికులు పోలీసులకు ఫిర్యాదు చేశారు.

తెరుచుకున్న మద్యం దుకాణాలు

మరోవైపు దాదాపు రెండు నెలల తర్వాత కేరళలో మద్యం విక్రయాలు ప్రారంభించింది ప్రభుత్వం. మద్యం షాపుల ముందు జనం గుమిగూడకుండా ఆన్​లైన్​ ద్వారా సేవలందించేందుకు సరికొత్త యాప్​ను ప్రవేశపెట్టింది.