సర్కార్​ 'లిక్కర్​ పాసుల' నిర్ణయంపై హైకోర్టు స్టే

మద్యం మత్తుకు బానిసలై, ఒత్తిడికి లోనవుతున్న వారికి ప్రత్యేకంగా లిక్కర్​ పాసులు ఇవ్వాలన్న కేరళ ప్రభుత్వ నిర్ణయాన్ని నిలుపుదల చేసింది హైకోర్టు. వారంలోగా వివరణ ఇవ్వాలని ప్రభుత్వాన్ని ఆదేశించింది. ఇటీవలే పినరయి సర్కార్ ఈ​ నిర్ణయం తీసుకోగా.. పలు వర్గాల నుంచి విమర్శలు వెల్లువెత్తాయి.

మందుబాబులకు ఊరటనిచ్చేలా కేరళ ప్రభుత్వం తీసుకున్న 'లిక్కర్​ పాసులు జారీ' నిర్ణయంపై రాష్ట్ర హైకోర్టు స్టే విధించింది. 3 వారాల పాటు ఈ నిలుపుదల కొనసాగుతుందని స్పష్టం చేసింది. ఈ అంశంపై వారంలోగా వివరణ ఇవ్వాలని ప్రభుత్వాన్ని ఆదేశించింది జస్టిస్​ ఏకే జయశంకరన్, జస్టిస్​ షాజీ సభ్యులుగా గల ధర్మాసనం.

దేశవ్యాప్తంగా 21 రోజుల లాక్​డౌన్​ కారణంగా.. మద్యం దుకాణాలు మూతపడ్డాయి. ఈ కారణంతో మందు చుక్క లేక విలవిల్లాడుతున్నారు ప్రజలు. కేరళలో ఇటీవల ముగ్గురు ఆత్మహత్య చేసుకున్నారు. ఈ నేపథ్యంలో వైద్యుల సూచన మేరకు మందు బాబులకు మద్యం విక్రయించేలా ఉత్తర్వులు జారీ చేసింది ప్రభుత్వం.

ఐఎంఏ వ్యతిరేకం..

సర్కారు నిర్ణయాన్ని సవాల్​ చేస్తూ.. కేరళ ప్రభుత్వ వైద్య అధికారుల సంఘం(కేజీఎంఓఏ) హైకోర్టుకు వెళ్లింది. అంతకుముందు.. మందు బానిసలకు మద్యం అందించాలన్న కేరళ ప్రభుత్వ నిర్ణయాన్ని భారతీయ వైద్య సంఘం(ఐఎం​ఏ) కూడా వ్యతిరేకించింది.

మద్యం లేక బలహీనతకు గురైతే ఆసుపత్రిలో చికిత్స అందించాలి కానీ, మద్యం ఇవ్వడం శాస్త్రీయంగా సరికాదని హితవు పలికింది ఐఎంఏ.