సీఏఏనే కాదు..ఎన్‌పీఆర్‌నూ అమలు చేసేది లేదు: కేరళ

పౌరసత్వ సవరణ చట్టాన్ని వ్యతిరేకించిన కేరళ ప్రభుత్వం తాజాగా జాతీయ పౌర పట్టికను కూడా అమలు చేసేది లేదని తేల్చి చెప్పింది. ఈ మేరకు నిర్వహించిన మంత్రివర్గ సమావేశంలో ప్రభుత్వం ఏకగ్రీవ నిర్ణయం తీసుకుంది.

పౌరసత్వ చట్టాన్ని వ్యతిరేకిస్తూ ఇప్పటికే సుప్రీం కోర్టును ఆశ్రయించిన కేరళ ప్రభుత్వం తాజాగా.. జాతీయ పౌర పట్టిక(ఎన్‌పీఆర్‌)ను కూడా అమలు చేసేది లేదని స్పష్టం చేసింది. ఈ మేరకు కేరళ ప్రభుత్వం నిర్వహించిన కేబినెట్‌ సమావేశంలో సభ్యులు ఏకగ్రీవంగా నిర్ణయం తీసుకున్నారు.

ఈ నేపథ్యంలోనే రాష్ట్రంలో ఎన్‌పీఆర్‌ను అమలు చేయబోమనే విషయాన్ని జనాభా లెక్కల రిజిస్ట్రార్‌ జనరల్‌కు తెలియజేయనున్నట్లు పినరయి విజయన్‌ ప్రభుత్వం వెల్లడించింది. గత నిబంధనల ప్రకారమే జనాభా లెక్కలను సేకరిస్తామని తెలిపింది.

"సాధారణ ప్రజలకున్న భయాల నుంచి ఉపశమనం కలిగించడం సహా, రాష్ట్రంలో శాంతి భద్రతలను పరిరక్షించేందుకు రాజ్యాంగ బద్దంగా ఏర్పాటైన ప్రభుత్వ బాధ్యతగా ఈ నిర్ణయం తీసుకున్నాం."

-కేరళ సీఎం కార్యాలయం

ఇప్పటికే జనాభా లెక్కలు 2020 జాబితాలో ఎన్‌పీఆర్‌ను చేర్చకూడదంటూ కేరళ జనరల్‌ అడ్మినిస్ట్రేట్‌ డిపార్ట్‌మెంట్‌ అన్ని జిల్లాల కలెక్టర్లకు ఆదేశాలు జారీ చేసింది. సీఏఏను కేరళ సీఎం పినరయి విజయన్‌ తీవ్రంగా వ్యతిరేకిస్తున్నారు. ఈ నేపథ్యంలోనే సీఏఏను వ్యతిరేకిస్తూ సుప్రీంకోర్టులో పిటిషన్‌ కూడా దాఖలు చేశారు. నిన్న సీఏఏకి వ్యతిరేకంగా జరిగిన ర్యాలీలో సీఎం పాల్గొన్నారు. ఈ విషయంపై రాష్ట్ర గవర్నర్‌ ఆరిఫ్‌ మొహ్మద్‌ తీవ్ర ఆగ్రహం వ్యక్తం చేస్తున్నారు.

ఇదీ చదవండి: మంచు కురిసింది.. జవాను పెళ్లి వాయిదా పడింది!