కర్'​నాటకం'పై దద్దరిల్లిన ఉభయసభలు

కర్ణాటక సంక్షోభంపై పార్లమెంటు ఉభయ సభలు కాంగ్రెస్​ నిరసనలతో హోరెత్తాయి. లోక్​సభలో కాంగ్రెస్​, డీఎంకే సభ్యులు వాకౌట్​ చేశారు. కాంగ్రెస్ నాయకుల నినాదాలతో రాజ్యసభ ఎలాంటి కార్యకలాపాలు నిర్వహించకుండానే బుధవారానికి వాయిదా పడింది.

కర్ణాటక రాజకీయ సంక్షోభం సెగ పార్లమెంటును తాకింది. కాంగ్రెస్​ సభ్యులు ఉభయ సభల్లో నిరసనలను కొనసాగించారు. భాజపాపై లోక్​సభలో కాంగ్రెస్ పక్షనేత అధీర్ రంజన్​ చౌదరి తీవ్రంగా విరుచుకుపడ్డారు.

కర్ణాటకలో ప్రభుత్వాన్ని కూల్చేందుకు భాజపా ప్రయత్నిస్తోందని అధీర్​ ఆరోపించారు. కొనుగోలు రాజకీయాలకు స్వస్తి పలకాలని డిమాండ్​ చేస్తూ పార్టీ సభ్యులతో కలిసి వాకౌట్​ చేశారు.

"రాజ్​భవన్​ నుంచి రాగానే కారు సిద్ధంగా ఉంటుంది. అక్కడినుంచి ఎయిర్​పోర్టుకు వెళ్లగానే విమానం సిద్ధంగా ఉంటుంది. హోటల్​ రెడీగా ఉంటుంది. వాళ్ల (భాజపా) నేతలు ఇప్పుడు కర్ణాటక తీసుకుంటున్నాం... భవిష్యత్తులో మధ్యప్రదేశ్​ను కూడా లాక్కుంటామంటున్నారు. ఈ కొనుగోలు రాజకీయాలకు స్వస్తి పలకాలి."
-అధీర్​ రంజన్​ చౌదరి, కాంగ్రెస్ పక్షనేత

రాహుల్​ నినాదాలు...

ఓ వైపు అధీర్​ రంజన్​ ఆవేశపూరితంగా ప్రసంగం చేస్తుంటే మరో వైపు కాంగ్రెస్ అధ్యక్షుడు రాహుల్​గాంధీ నినాదాలు చేశారు. మొదటి సారిగా పార్లమెంటులో ఈ విధమైన నిరసన చేపట్టారు రాహుల్.

'నియంతపాలన అంతమవ్వాలి, కొనుగోలు రాజకీయాలకు స్వస్తి పలకాలి' అంటూ మొదట సభ్యులు నినదించారు. రాహుల్​ వారిని అనుసరించారు.

రాజ్యసభలోనూ వాయిదాల పర్వం

కర్ణాటక సంక్షోభంపై కాంగ్రెస్​ సభ్యుల నిరసనలతో ఎగువ సభలో గందరగోళం నెలకొంది. మూడు సార్లు సభ వాయిదా పడింది. సభలో రోజంతా ఎటువంటి చర్చా జరగలేదు. ఉదయం సభ ప్రారంభం అయినప్పటి నుంచి వెల్​లోకి దూసుకెళ్లిన సభ్యులు నినాదాలు చేస్తూనే ఉన్నారు.

కాంగ్రెస్​తో పాటు ప్రైవేటీకరణను వ్యతిరేకిస్తూ తృణమూల్​ ఎంపీలు వెల్​లోకి వచ్చారు. ఫలితంగా మధ్యాహ్నం 12 గంటల వరకు మొదటి సారి వాయిదా వేశారు ఛైర్మన్ వెంకయ్యనాయుడు. అనంతరం సభ ప్రారంభమయ్యాక ప్రశ్నోత్తరాలను మొదలుపెట్టారు డిప్యూటీ ఛైర్మన్ హరివంశ్. అయినా పరిస్థితిలో మార్పు రాకపోగా... 2 గంటల వరకు వాయిదా పడింది.

మూడోసారీ పరిస్థితి మారలేదు. సభను బుధవారానికి వాయిదా వేశారు.

ఇదీ చూడండి:- 'కర్ణాటకీయం'కు ముగింపు దొరికేనా...?