సీఎం కార్యాలయ ముట్టడికి యత్నం.. కాంగ్రెస్​ నేతల అరెస్ట్​

కర్ణాటక సీఎం కార్యాలయ ముట్టడికి యత్నించిన కాంగ్రెస్​ నాయకులను అదుపులోకి తీసుకున్నారు పోలీసులు. బీదర్​లోని ఓ పాఠశాల విద్యార్థుల తల్లిదండ్రులు, ప్రధానోపాధ్యాయురాలిపై దేశద్రోహం కేసు నమోదు చేయడాన్ని తప్పుబడుతూ నిరసనలు చేపట్టిన రాష్ట్ర కాంగ్రెస్​ అధ్యక్షుడు దినేశ్​ గుండురావు, బెంగళురు మాజీ ముఖ్యమంత్రి సిద్ధరామయ్య సహా పలువురు నేతలు అరెస్ట్​ అయ్యారు.

కర్ణాటకలో భాజపా ప్రభుత్వం అప్రజాస్వామ్యంగా వ్యవహరిస్తోందని.. అమాయకులను దేశద్రోహులంటూ తప్పుడు కేసులు నమోదు చేయిస్తోందని ఆరోపిస్తూ నిరసనలు చేపట్టారు కాంగ్రెస్​ నేతలు. ముఖ్యమంత్రి బీ ఎస్​ యడియూరప్ప కార్యాలయ ముట్టడికి యత్నించి ఆందోళన వ్యక్తం చేశారు. ఈ నేపథ్యంలో కర్ణాటక కాంగ్రెస్​ రాష్ట్ర అధ్యక్షుడు దినేశ్​ గుండురావు, కర్ణాటక మాజీ ముఖ్యమంత్రి సిద్ధరామయ్య సహా పలువురిని అరెస్ట్​ చేశారు పోలీసులు.

రాష్ట్రంలో భాజపా ప్రభుత్వం పోలీసు శాఖను దుర్వినియోగం చేస్తోందని నిరసిస్తూ గాంధీ విగ్రహం నుంచి రేస్​కోర్స్​ రోడ్డు వరకు ర్యాలీ నిర్వహించారు కాంగ్రెస్​ కార్యకర్తలు. ముఖ్యమంత్రి బీఎస్ యడియూరప్ప కార్యాలయం ముట్టడికి యత్నించారు గుండు రావు, బెంగళూరు రూరల్​ ఎంపీ డీ కే సురేశ్​. నిరసనకారులను అదుపు చేసేందుకు పోలీసులు ఏర్పాటు చేసిన బారికేడ్లపై నుంచి దూకడానికి ప్రయత్నించారు. పరిస్థితి ఉద్రిక్తంగా మారటంతో పోలీసులు నిరసనకారులను అదుపులోకి తీసుకున్నారు.

'భాజపా పద్ధతేమీ బాలేదు'

భాజపా ప్రభుత్వ విధానాలను తప్పుబట్టారు సిద్ధరామయ్య . సీసీఏ, ఎన్​ఆర్​సీలను వ్యతిరేకించినందుకు మైసూరు విద్యార్థి యూటీ ఖాదర్​పై కేసులు నమోదు చేశారు.. కానీ, ప్రజల్ని రెచ్చగొట్టే ప్రసంగాలు చేస్తున్న భాజపా నేతలు సోమశేఖర రెడ్డి, అనంతకుమార్​ హెగ్డేలపై ఎలాంటి కేసులు నమోదు చేయలేదంటూ ఆయన మండిపడ్డారు.

"భాజపా అప్రజాస్వామిక విధానాలను అనుసరిస్తోంది. ప్రజల హక్కులను అణచివేసే హక్కు పోలీసులకు లేదు. భాజపా కార్యకర్తలు దుర్భాష ఉపయోగిస్తూ దేశ వ్యతిరేక వ్యాఖ్యలు చేస్తున్నారు. అయినా వారిపై ఎటువంటి కేసులు నమోదు కాలేదు. కాంగ్రెస్‌ను అణిచివేసేందుకే భాజపా ప్రయత్నిస్తోంది. పోలీసు బలగాలను స్వలాభాల కోసం ఉపయోగించుకుంటోంది. "

-సిద్ధరామయ్య, మాజీ ముఖ్యమంత్రి

నిరసన ఇందుకే....

బీదర్​లోని ఓ పాఠశాల కార్యక్రమంలో సీఏఏ (పౌరసత్వ సవరణ చట్టం), ఎన్​ఆర్​సీ( జాతీయ పౌర పట్టిక)లపై ఓ నాటకం ప్రదర్శించారు విద్యార్థులు. అందులో ప్రధాని మోదీ చీకట్లో ఉన్నట్లుగా చిత్రీకరించారు. భాజపా ప్రభుత్వం కావాలనే ఆ నాటకంలో పాల్గొన్న విద్యార్థుల తల్లిదండ్రులు, పాఠశాల ప్రధానోపాధ్యాయులపై దేశద్రోహం కేసు పెట్టి అరెస్టు చేయించిందని కాంగ్రెస్ ఆరోపించింది. అరెస్ట్​ను వ్యతిరేకిస్తూ భాజపా విభజన విధానాలు అనుసరిస్తోందని నిరసనలు చేపడుపడుతోంది.

ఇదీ చదవండి:భారత 'బోల్ట్'​కు శాయ్​లో శిక్షణ.. ఒలింపిక్స్​ కోసమేనా!