దుబేకు ఆ పోలీస్ రహస్య సాయం- ఆడియో క్లిప్ లీక్

8 మంది పోలీసులను బలిగొన్న యూపీ గ్యాంగ్​స్టర్​ వికాస్​ దుబే కేసుకు సంబంధించి కీలకమైన ఆడియో రికార్డు బయటకు వచ్చింది. దుబే అనుచరుల కాల్పుల్లో అమరుడైన డీఎస్పీ దేవేంద్ర మిశ్రా.. ఎస్పీ బ్రిజేశ్​ శ్రీవాస్తవతో ఆ ఘటనకు ముందు మాట్లాడిన క్లిప్ ఇది. ఇందులో ఉన్న సమాచారం ప్రకారం.. 8 మంది పోలీసుల మరణానికి కారణం ఇంటి దొంగల పనేనని అర్థమవుతోంది.

ఉత్తర్​ప్రదేశ్​ కాన్పుర్​లోని బిక్రూ గ్రామం.. జులై 3 సాయంత్రం.. గ్యాంగ్​స్టర్​ వికాస్​ దుబేను అరెస్టు చేసేందుకు కాన్పుర్​ డీఎస్పీ దేవేంద్ర మిశ్రా నేతృత్వంలోని పోలీసులు బృందం అతని ఇంటికి వెళ్లింది. హఠాత్తుగా దుబే అనుచరులు మిశ్రా బృందంపై విచక్షణా రహితంగా కాల్పులకు తెగబడ్డారు.

ఈ ఘటనలో మిశ్రాతో సహా 8 మంది పోలీసులు అమరులయ్యారు. ఓ గ్యాంగ్​స్టర్​ చేసిన ఈ దాడి దేశవ్యాప్తంగా సంచలనం రేపింది. అయితే దుబేకు సమాచారం ఇచ్చింది ఇంటి దొంగలేనని అప్పట్లో వార్తలు వచ్చాయి. విచారించిన పోలీసులు కూడా కొంతమంది అధికారులను సస్పెండ్ చేశారు.

దుబే కాల్పుల్లో అమరుడైన డీఎస్పీ దేవేంద్ర మిశ్రా

ఆడియో క్లిప్పులో సాక్ష్యాలు!

ఈ ఘటనకు సంబంధించి తాజాగా ఓ ఆడియో క్లిప్​ సామాజిక మాధ్యమాల్లో చక్కర్లు కొడుతోంది. కాన్పుర్​ ఎస్పీ బ్రిజేశ్​ శ్రీవాస్తవ​తో మిశ్రా మాట్లాడినట్లు ఉన్న ఈ ఆడియో క్లిప్.. దుబే ఇంటికి వెళ్లే ముందు జరిగిన సంభాషణనేనా? వారి సంభాషణను బట్టి దుబేకు చౌబేపుర్​ స్టేషన్ అధికారి (ఎస్​ఓ) వినయ్ తివారీ ఉప్పందించి ఉంటాడా? అనే అనుమానాలు వ్యక్తమవుతున్నాయి.

తివారీ ఒత్తిడితోనే ముందుగా మిశ్రా.. దుబేను పట్టుకునేందుకు వెళ్లారా? మిశ్రా దుబే ఇంటికి వెళ్లిన తర్వాతనే తివారీ వస్తానని పట్టుబట్టాడా? అసలు ఈ ఆడియో క్లిప్​లో ఏముంది?

ఎస్పీతో మిశ్రా సంభాషణ ఇలా..

మిశ్రా: దుబేను పట్టుకునేందుకు ముందుగా నన్ను వెళ్లమని ఎస్​ఓ చెప్పాడు. నేను అక్కడికి చేరుకున్న తర్వాతనే ఆయన వస్తానన్నాడు. అందుకే నేను వెళుతున్నా.

ఎస్పీ: మీరు కంగారు పడాల్సిన పనిలేదు. మీరు ఆలోచించి పనిచేయండి. దుబేను పట్టుకొనే గొప్ప అవకాశం ఇది.

మిశ్రా: దుబేకు తివారీ అన్ని విధాల సహకరిస్తున్నాడు. అతని గురించి నేను చెబుతాను. దుబేతో అతనికి సంబంధాలు ఉంటే మరో మూడు నాలుగు హత్యలు జరుగుతాయి. ఒక నేరస్థుడి గురించి మరో నేరస్థుడే చెప్పగలడు. ఇప్పటికే దుబేకు మన రెయిడ్​ గురించి సమాచారం ఇచ్చి పారిపోవాలని చెప్పి ఉంటాడు.

ఈ ఆడియో క్లిప్​లో చివరగా మాజీ ఎస్​ఎస్​పీ అనంత్ దేవ్​ తివారీపైనా మిశ్రా ఆరోపణలు చేశారు. ఎస్​ఓ నుంచి రూ.5 లక్షలు తీసుకుని అన్ని దర్యాప్తులను అనంత్ దేవ్ వదిలేశారని వెల్లడించారు.

తివారీతో మిశ్రా మాట్లాడిన మరో ఆడియో క్లిప్​ కూడా బయటకు వచ్చింది.

వీరిద్దరిపై విచారణ..

తొలుత దుబేకు ఎస్​ఓ వినయ్ తివారీ సమాచారం ఇచ్చారని పోలీసులు అనుమానించారు. అదుపులోకి తీసుకుని విచారించారు. ఈ విషయంలో ఎస్​ఎస్​పీ అనంత్​ దేవ్​ను కూడా అనుమానించిన పోలీసులు మురాదాబాద్​ పీఏసీకి తరలించారు.

ఇదీ చూడండి:రౌడీషీటర్ల దాడిలో 8 మంది పోలీసులు మృతి