'అవకాశం ఉంటే సుదీర్ఘంగా న్యాయమూర్తిగా పనిచేస్తాం'

పదవీ విరమణ వయసు పెంచితే న్యాయమూర్తులు ఎక్కువకాలం పనిచేసేందుకు సిద్ధంగా ఉన్నారని భారత ప్రధాన న్యాయమూర్తి జస్టిస్ ఎస్​ఏ బోబ్డే ఉద్ఘాటించారు. న్యాయాధికారిగా కాకుండా బార్​ సభ్యునిగానే ఈ అభిప్రాయాన్ని వెల్లడించారు సీజేఐ. సుప్రీంకోర్టు బార్ అసోసియేషన్ ఏర్పాటు చేసిన సన్మాన కార్యక్రమంలో ఈ వ్యాఖ్యలు చేశారు జస్టిస్ బోబ్డే.

అవకాశం ఉంటే న్యాయమూర్తులు అధిక కాలం పనిచేసేందుకు సిద్ధమని భారత ప్రధాన న్యాయమూర్తి జస్టిస్​ ఎస్ఏ​ బోబ్డే వ్యాఖ్యానించారు. అటార్నీ జనరల్ కేకే వేణుగోపాల్ చేసిన సూచనపై స్పందించిన ఆయన బార్​కౌన్సిల్​ సభ్యుడిగా ఇది తన అభిప్రాయమని, సీజేఐగా మాత్రం కాదని స్పష్టం చేశారు.

"న్యాయమూర్తుల పదవీకాలం గురించి అటార్నీ జనరల్ చెప్పినదాని గురించి నేనేమీ అనను. వేణుగోపాల్ బార్​ సభ్యునిగా ప్రసంగించారు. నేను కూడా బార్ సభ్యునిగానే చెబుతున్నాను. న్యాయమూర్తుల పదవీ విరమణ వయసు పెంచితే సుదీర్ఘంగా పనిచేయడానికి సిద్ధంగా ఉన్నాం."

- జస్టిస్ ఎస్​ఏ బోబ్డే, భారత ప్రధాన న్యాయమూర్తి

భారత 47వ ప్రధాన న్యాయమూర్తిగా నవంబర్ 18న జస్టిస్​ బోబ్డే బాధ్యతలు చేపట్టారు. ఈ సందర్భంగా ఆయనకు సుప్రీంకోర్టు బార్ అసోసియేషన్​ సన్మాన కార్యక్రమం నిర్వహించింది. ఈ సందర్భంగా న్యాయవాదుల వయసుపై అటార్నీ జనరల్ కేకే వేణుగోపాల్​ ప్రస్తావించారు.

"న్యాయవాదులు 70,80 ఏళ్లున్నా.. తమ కేసులను అద్భుతంగా వాదిస్తున్నారు. న్యాయమూర్తులకూ ఆ సామర్థ్యం ఉంది. అందువల్ల సుప్రీంకోర్టు న్యాయమూర్తుల పదవీవిరమణ వయస్సు 70 ఏళ్లకు, హైకోర్టు న్యాయమూర్తులకైతే 68 ఏళ్లకు పెంచవచ్చు.''

-కేకే వేణుగోపాల్, ఏజీఐ

ప్రస్తుతం సుప్రీంకోర్టు న్యాయమూర్తుల పదవీ విరమణ వయస్సు 65 ఏళ్లుకాగా, హైకోర్టు న్యాయమూర్తులకు ఇది 62 ఏళ్లుగా ఉంది.

ఇదీ చూడండి: 1008 మంది బాలికలకు కన్యాపూజ- 'లిమ్కా' బుక్​లో చోటు