ప్రేమ విఫలం.. రైలు కింద పడి యువకుడి ఆత్మహత్య

ప్రేమించిన అమ్మాయి దూరమైందనే మనస్తాపంతో ఓ యువకుడు ఆత్మహత్య చేసుకున్నాడు. అతి వేగంతో వస్తున్న రైలు కిందపడి ప్రాణాలొదిలాడు. అంతకుముందు తన ఆత్మహత్యకు గల కారణాన్ని చెబుతూ ఒక సెల్ఫీ వీడియోను తీసుకున్నాడు.

ప్రేమ విఫలమైందనే మనస్తాపంతో ఒడిశాకు చెందిన ఓ యువకుడు అత్మహత్య చేసుకున్నాడు. కటక్ జిల్లా మాట్రూ భవన్ పరిధిలో ఈ విషాద ఘటన జరిగింది. అతి వేగంతో రైలు వస్తుండగా.. ఒక్కసారిగా పట్టాలపైకి దూకి అక్కడికక్కడే ప్రాణాలొదిలాడు.

విషయం తెలుసుకున్న రైల్వే పోలీసులు ఘటనా స్థలానికి చేరుకుని మృతదేహాన్ని స్వాధీనం చేసున్నారు. మృతుడు నయాలి ప్రాంతానికి చెందిన మనోజ్​ కుమార్​గా గుర్తించారు. అత్మహత్యకు ముందు మనోజ్​ తన సెల్​ఫోన్​లో ఓ సెల్ఫీ వీడియో తీసుకున్నట్లు పోలీసులు స్పష్టం చేశారు.

ఇదీ జరిగింది

ఓ అమ్మాయితో మనోజ్​ కుమార్ మూడేళ్లుగా ప్రేమలో ఉన్నాడు. అనంతరం వారిద్దరి మధ్య విభేదాలు తలెత్తి విడిపోయారు. ఈ క్రమంలో తను ప్రేమించిన అమ్మాయి మరొక యువకుడితో ప్రేమలో పడిందని, అతడితో పెళ్లికూడా నిశ్చయమైందని తెలిసి ​ తట్టుకోలేక ఆత్మహత్యకు పాల్పడుతున్నట్లు మనోజ్​ తన సెల్ఫీ వీడియోలో తెలిపాడు.