జమ్ములో భారీ ఉగ్ర కుట్ర భగ్నం.. ముష్కరుడి అరెస్టు

జమ్ము కశ్మీర్​లో జైషే మహ్మద్​ ప్రణాళిక రచించిన మరో భారీ ఉగ్ర కుట్రను పోలీసులు భగ్నం చేశారు. బారాముల్లాలో ముష్కరుని అరెస్టు చేసిన పోలీసులు.. అతని వద్ద నుంచి ఆయుధాలు, పేలుడు సామగ్రిని స్వాధీనం చేసుకున్నారు.

జమ్ము కశ్మీర్​ బారాముల్లాలో భారీ ఉగ్రదాడి ప్రణాళికను పోలీసులు భగ్నం చేశారు. జైషే మహ్మద్​ ఉగ్రసంస్థకు చెందిన ముష్కరుడిని అరెస్టు చేశారు. అతని దగ్గరి నుంచి ఆయుధాలు, పేలుడు సామగ్రిని స్వాధీనం చేసుకున్నారు.

నిందితుడిని బారాముల్లా పాత బస్తీకి చెందిన మోసీన్​ మంజూర్​గా గుర్తించినట్లు జమ్ము కశ్మీర్​ డీజీపీ దిల్​బాగ్ సింగ్​ తెలిపారు. బారాముల్లాలో కొత్తగా శిక్షణ పొందిన ముగ్గురి బృందంలో మోసీన్​ ఒకరని.. జిల్లాలో ఉగ్రదాడులు చేసేందుకు వీరిని నియమించినట్లు పేర్కొన్నారు.

"ఈ బృందంలోని ఒక ఉగ్రవాదిని గత నెలలో జరిగిన ఎన్​కౌంటర్​లో మట్టుబెట్టాం. ఈ ఘటనలో బిలాల్​ భట్​ అనే పోలీసు అధికారి మరణించారు. ఎస్సై అమర్​దీప్​ తీవ్రంగా గాయపడ్డారు. అనంతరం జరిగిన తనిఖీల్లో మరో ఉగ్రవాదిని అదుపులోకి తీసుకున్నాం. ఇప్పుడు మూడో వ్యక్తిని అరెస్టు చేశాం. ఇక్కడితో వీరి కుట్రకు ముగింపు పలికాం."

-జమ్ము కశ్మీర్ పోలీసు విభాగం

ఇదీ చూడండి: జాతీయ యుద్ధ స్మారకంపై స్క్వాడ్రన్ లీడర్ రవిఖన్నా పేరు