రద్దు అయిన నోట్లను చలామణిలో ఉన్న సొమ్ముకు మార్చేందుకు ప్రయత్నించి మోసానికి పాల్పడిన ఓ బ్యాంకు ఎగ్జిక్యూటివ్ మేనేజర్తో పాటు మరో ఐదుగురిపై కేసు నమోదు చేసింది కేంద్ర దర్యాప్తు సంస్థ. ఈ మొత్తం సొమ్ము రూ. 12.84కోట్లు అని ఎఫ్ఐఆర్లో పేర్కొంది.
ఎగ్జిక్యూటివ్ మేనేజర్తో బంధం..
ఈ వ్యవహారంపై గతేడాది డిసెంబర్ 10న సమాచారం అందుకుంది సీబీఐ. జమ్ముకశ్మీర్ బ్యాంక్కు చెందిన ఘజియాబాద్ బ్రాంచ్లో రాహుల్ చౌదరీ, దుష్యంత్ చౌదరిలు.. మూడు కంపెనీ(శివ ట్రేడింగ్ కంపెనీ, దివ్యాంషి సేల్స్ కార్పరేషన్, శ్యామ్ ట్రేడింగ్ కంపెనీ)ల అకౌంట్లను నిర్వహిస్తున్నట్టు తెలుసుకుంది.
ఎగ్జిక్యూటివ్ మేనేజర్ నేతర్ సభర్వార్తో ఉన్న అనుబంధంతో.. సంస్థల ప్రొప్రైయిటర్ల బదులు, వీళ్లే అకౌంట్లను నిర్వహించడం మొదలుపెట్టారు. ఈ క్రమంలోనే ఎగ్జిక్యూటివ్ మేనేజర్ కూడా వారికి సహాయం చేశారు. కంపెనీ ఖాతాల్లో ఫోన్ నెంబర్లు మార్చి.. నగదు బదిలీ సమయంలో ఎస్ఎమ్ఎస్ అలర్ట్లు రాకుండా చూసుకున్నారు.
2016 నవంబర్ 8న.. కేంద్రం రూ. 1000, రూ. 500 నోట్లను రద్దు చేసిన అనంతరం.. ఆర్బీఐ నిబంధనలను ఉల్లంఘిస్తూ.. మూడు కంపెనీల ఖాతాల్లో రూ. 12.84కోట్ల నగదును వేశారు. ఇందుకు సభర్వార్ సహకరించారు.
ఫోన్ నెంబర్లు మార్చిన అనంతరం ఈ సొమ్మును ఆర్టీజీఎస్(రియల్ టైమ్ గ్రాస్ సెటిల్మెంట్) ద్వారా వివిధ బ్యాంక్ ఖాతాలకు బదిలీ చేశారు.
ఇదీ చదవండి :మొదటి స్వదేశీ మెషీన్ గన్ అభివృద్ధి
