మహాత్మా గాంధీ బోధించిన శాంతి, అహింసయే ఆదర్శంగా ఏక్తా పరిషత్... 'జై జగత్' పేరిట పాదయాత్ర ప్రారంభించాలని సంకల్పించింది. దిల్లీ నుంచి జెనీవా వరకు ఏడాది పాటు సాగే ఈ యాత్రలో గాంధేయవాదులు పాల్గొంటారు. మహాత్ముని జయంతి అక్టోబర్ 2 నుంచి ఈ యాత్ర ప్రారంభం కానుంది.
'జై జగత్' యాత్రలో కెనడా, ఫ్రాన్స్, జర్మనీ, ఇరాన్, సెనెగల్, స్వీడన్, బెల్జియం దేశాలకు చెందిన ప్రతినిధి బృందాలు పాల్గొంటాయని ఏక్తా పరిషత్ జాతీయ కన్వీనర్ అనీష్ తిల్లెంకరీ తెలిపారు.
ఏడాదిపాటు జరిగే ఈ యాత్రకు సామాజిక కార్యకర్త పీవీ రాజగోపాల్, గాంధేయవాదంపై పరిశోధన చేసిన కెనడియన్ నాయకుడు జిల్ కార్-హారిస్, ఎస్టీ, ఎస్సీ హక్కుల పోరాట నాయకుడు రమేశ్ శర్మ సారథ్యం వహించనున్నారు.
ముందుగా ఈ బృందం 'జై జగత్' యాత్రను దిల్లీలో ప్రారంభించి మహారాష్ట్రలోని సేవాగ్రామ్కు చేరుకుంటుంది. అక్కడ మహాత్ముడి ఆశ్రమాన్ని సందర్శించుకొని, నాగ్పుర్లో విమానయాన మార్గం ద్వారా ఇరాన్ వెళ్తారు. తర్వాత అక్కడి నుంచి అర్మేనియా వరకు యాత్ర కొనసాగుతుంది.
"కొన్ని రోజుల క్రితం గాంధీ సిద్ధాంతాలను తెలుసుకోవటం కోసం అర్మేనియా నుంచి ఓ వ్యక్తి భారత్కి వచ్చాడు. తర్వాత ఇక్కడ నేర్చుకొన్న సిద్ధాంతాలను తన దేశంలో ప్రచారం చేశాడు. ఇప్పుడు అతను అర్మేనియా దేశానికి ప్రధాని అయ్యాడు. అతనే నికోల్ పశీన్యన్."
-తిల్లెన్‌కేరి, ఏక్తా పరిషత్ జాతీయ కన్వీనర్
పాక్లోనూ శాంతియాత్ర
ముందుగా ఈ యాత్రను 2 నెలలపాటు పాకిస్థాన్లోనూ చేపట్టాలని భావించారు. కానీ ఇరుదేశాల మధ్య నెలకొన్న ఉద్రిక్త పరిస్థితుల దృష్ట్యా ఆ ప్రతిపాదనను పక్కన పెట్టారు. ముందుగా అనుకున్న ప్రణాళిక ప్రకారం అయితే... రాజ్ఘాట్ నుంచి అట్టారీ- వాఘా సరిహద్దు వరకు, తర్వాత లాహోర్ నుంచి ఇరాన్ వరకు యాత్ర జరపాలని అనుకున్నారు. కానీ అట్టారీ- వాఘా సరిహద్దును మూసివేయటం వలన ఆ నిర్ణయాన్ని రద్దు చేసుకున్నారు.
'జై జగత్' యాత్ర వచ్చే ఏడాది సెప్టెంబర్ 26న జెనీవా చేరుకుంటుంది. జెనీవాలోని 30 మున్సిపాలిటీ అధికారులు ఈ యాత్రకు ఆతిథ్యం ఇవ్వనున్నట్లు తిల్లెన్‌కేరి తెలిపారు.
ఇదీ చూడండి:నీటి పొదుపు తక్షణావసరం: రాష్ట్రపతి
