ఐదుగురు సహచరుల్ని బలిగొన్న జవాన్- ఎందుకు?

ఓ జవాను తన సహచరులపై కాల్పులు జరిపి ఐదుగురు ప్రాణాలు బలిగొన్న ఘటన ఛత్తీస్​గఢ్​లోని నారాయణ్​పుర్​లో చోటుచేసుకుంది. అనంతరం తనను తాను కాల్చుకుని ఆత్మహత్య చేసుకున్నాడు. అతడు ఇంత ఘోరానికి ఎందుకు తెగబడ్డాడనే కారణాలు ఇంకా తెలియలేదు.

ఛత్తీస్​గఢ్​లోని నారాయణ్​పుర్​లో దారుణ ఘటన చోటుచేసుకుంది. ఐటీబీపీకి చెందిన ఓ జవాను తన సహచరులపై తుపాకీతో కాల్పులు జరిపాడు. ఈ ఘటనలో ఐదుగురు సైనికులు ప్రాణాలు కోల్పోయారు. మరో ఇద్దరు గాయపడ్డారు. వీరిని హెలికాప్టర్​ సహాయంతో రాయ్​పుర్​లోని ఓ ప్రవేటు ఆసుపత్రికి తరలించారు.

ఘటనాస్థలంలో.. కాల్పులు జరిపిన జవాను మృతదేహం కూడా లభించింది. అతడిని మసూదుల్​ రహ్మాన్​గా గుర్తించారు. అతడు ఆత్మహత్యకు పాల్పడ్డాడా? లేక ఇతర సైనికులే అతడిని కాల్చిచంపారా? అన్న అనుమానాలు తలెత్తాయి. అయితే... సహచరులపై దాడి అనంతరం రహ్మాన్​ తనను తాను కాల్చుకుని ఆత్మహత్య చేసుకున్నాడని అధికారులు ప్రకటించారు.

రహ్మాన్​ ప్రవర్తనకు గల కారణాలు ఇంకా తెలియలేదు.

ఈ ఘోరం ఇండో-టిబెటిన్​ బార్డర్​ పోలీస్​(ఐటీబీపీ) 45వ బెటాలియన్​ ఉంటున్న కేదానర్​ గ్రామంలో ఉదయం 8 గంటల 30 నిమిషాలకు జరిగింది.

రహ్మాన్ జరిపిన​ కాల్పుల్లో ప్రాణాలు కోల్పోయిన వారి పేర్లు... హెడ్​ కానిస్టేబుల్​- మహేంద్ర సింగ్​, దల్జిత్​ సింగ్​, కానిస్టేబుల్​- సుర్జిత్​ సర్కార్​, బిస్వరూప్​ మహతో, బిజేశ్​.
ఈ ఘటనపై ఛత్తీస్​గఢ్​ ముఖ్యమంత్రి తీవ్ర దిగ్భ్రాంతి వ్యక్తం చేశారు.