బినామీ ఆస్తుల వ్యవహారంలో బీఎస్పీ అధినేత్రి మాయావతి కుటుంబానికి గట్టి ఎదురుదెబ్బ తగిలింది. మాయావతి సోదరుడు ఆనంద్ కుమార్, ఆయన భార్య విచితర్ లతకు చెందిన రూ.400 కోట్ల విలువైన బినామీ స్థలాన్ని ఆదాయపన్ను శాఖ జప్తు చేసింది. బినామీ ఆస్తుల లావాదేవీల నిరోధక చట్టం కింద ఐటీ శాఖ ఈ భూమిని స్వాధీనం చేసుకుంది.
నోయిడాలో 7 ఎకరాల్లో విస్తరించిన ఈ ప్లాట్ను.. మాయావతి సోదరుడి కుటుంబం బినామీ ఆస్తిగా ఐటీ శాఖ గుర్తించింది. జప్తు కోసం ఈ నెల 16న ఆదేశాలు జారీ చేసింది దిల్లీ ఆధారిత బినామీ నిషేధ విభాగం(బీపీయూ).
ఉత్తర్ప్రదేశ్ గౌతమ్ బుద్ధనగర్ జిల్లాలోని నోయిడాలో నంబర్ 2ఏ, సెక్టార్ 94లో ఈ ప్లాట్ ఉంది. అందులో విలాసవంతమైన సౌకర్యాలతో ఐదు నక్షత్రాల హోటల్ నిర్మించాలని యోచించారు.