శక్తిమంతమైన కెమెరాను నింగిలోకి పంపే పనిలో ఇస్రో

మరో ఉపగ్రహ ప్రయోగానికి భారత అంతరిక్ష పరిశోధన సంస్థ సిద్ధమైంది. కార్టోశాట్-3 ఉపగ్రహాన్ని కక్ష్యలో ప్రవేశపెట్టడానికి ముహూర్తం ఖరారు చేసింది. నవంబర్ 25న ఉదయం 9:26 గంటలకు ప్రయోగం చేపట్టనున్నట్లు ఇస్రో వెల్లడించింది. అమెరికాకు చెందిన 13 ఉపగ్రహాలను సైతం ఈ ప్రయోగం ద్వారా నింగిలోకి పంపించనుంది.

భారత అంతరిక్ష పరిశోధన సంస్థ(ఇస్రో) మరో ప్రయోగానికి సిద్ధమైంది. ఎర్త్ ఇమేజింగ్, మ్యాపింగ్ ఉపగ్రహం కార్టోశాట్-3ని నవంబర్ 25 న నింగిలోకి పంపనున్నట్లు ప్రకటించింది. ఉదయం 9:28 గంటలకు ప్రయోగానికి ముహూర్తం ఖరారు చేసినట్లు ఇస్రో వెల్లడించింది.

హై రిజల్యూషన్ చిత్రాలు తీసే సామర్థ్యం​ కలిగిన 'కార్టోశాట్-3'ని... మూడో తరానికి చెందిన అధునాతన ఉపగ్రహంగా అభివర్ణించింది ఇస్రో. శ్రీహరికోటలోని షార్​ వేదికగా నిర్వహించనున్న 74వ ప్రయోగమని తెలిపింది.

అమెరికా ఉపగ్రహాలు సైతం

అమెరికాతో కుదుర్చుకున్న వాణిజ్య ఒప్పందంలో భాగంగా ఆ దేశానికి చెందిన 13 చిన్న ఉపగ్రహాలను ఈ ప్రయోగం ద్వారా అంతరిక్షంలోకి చేర్చనుంది ఇస్రో. పోలార్ శాటిలైట్ లాంచ్ వెహికిల్(పీఎస్​ఎల్​వీ) సీ-47 ద్వారా ఈ ఉపగ్రహాలను కక్ష్యలో ప్రవేశపెట్టనుంది. ఆంధ్రప్రదేశ్​ శ్రీహరికోటలోని సతీష్ ధావన్ అంతరిక్ష కేంద్రం ఇందుకు వేదిక కానుంది.