భారత అంతరిక్ష పరిశోధన సంస్థ-ఇస్త్రో ప్రతిష్టాత్మకంగా రూపొందించిన చంద్రయాన్-2లోని విక్రమ్ ల్యాండర్, ప్రజ్ఞాన్ రోవర్ల కథ సమాప్తమైనట్లు తెలుస్తోంది. ఇస్త్రో ఛైర్మన్ శివన్ మాటలు ఈ విషయాన్ని బలపరుస్తున్నాయి. ఇప్పటి వరకు ల్యాండర్తో కమ్యూనికేషన్ను పునరుద్ధరించలేకపోయామని తాజాగా వెల్లడించారు శివన్. కానీ ఆర్బిటర్ చాలా బాగా పనిచేస్తోందని.. ఈ ప్రాజెక్టులో 98 శాతం విజయం సాధించామని భువనేశ్వర్లో వివరించారు.
"చంద్రయాన్-2 ఆర్బిటర్ చాలా బాగా పనిచేస్తోంది. అందులో 8 శాంకేతిక పరికరాలు ఉన్నాయి. ప్రతి పరికరం అనుకున్నట్లుగానే సక్రమంగా పనిచేస్తోంది. చంద్రయాన్-2 ఆర్బిటర్లో మరో ముఖ్య విషయం... దాని జీవిత కాలం. మేము ఒక సంవత్సర కాలం పాటు పనిచేసేలా రూపొందించాం కానీ అది ఏడున్నరేళ్లకు పెరిగింది. ఏడున్నరేళ్లపాటు దాని ద్వారా పరిశోధన జరగనుంది.
ల్యాండర్తో ఇప్పటి వరకు సమాచారాన్ని పునరుద్ధరించలేకపోయాం. చంద్రయాన్-2లో రెండు లక్ష్యాలు ఉండటం వల్ల 98 శాతం విజయం సాధించినట్లు చెబుతున్నాం.
గగన్యాన్ మిషన్ అనేది మా ముందున్న తదుపరి ముఖ్యమైన ప్రాజెక్టు. తొలిసారి మానవసహిత మిషన్ను వచ్చే ఏడాది చివర్లో చేపట్టబోతున్నాం. ఆ ప్రాజెక్టుపైనే పని చేస్తున్నాం."