చంద్రుడి కక్ష్యలోకి ప్రవేశించడం వల్ల చంద్రయాన్-2లో మరో కీలక ఘట్టం ఆవిష్కృతమైందని ఇస్రో ఛైర్మన్ శివన్ తెలిపారు. అత్యంత ముఖ్యమైన ఘట్టాన్ని సమర్థంగా పూర్తిచేశామని హర్షం వ్యక్తం చేశారు.
"చంద్రయాన్-2 ఈ రోజు ఉదయం 9 గంటలకు చంద్రుడి కక్ష్యలోకి ప్రవేశించింది. మొత్తం ప్రక్రియ పూర్తవడానికి 30నిమిషాల సమయం పట్టింది" అని శివన్ వివరించారు.
సెప్టెంబర్ 2న ఆర్బిటర్ నుంచి ల్యాండర్ విడిపోనుందని ఇస్రో ఛైర్మన్ వెల్లడించారు. అనంతరం సెప్టెంబర్ 7న చంద్రుడిపై ల్యాండర్ దిగనుందని పేర్కొన్నారు. ఆ రోజు కోసం ఎంతో ఆసక్తిగా ఎదురు చూస్తున్నట్టు ఈటీవీ భారత్కు ఇచ్చిన ప్రత్యేక ఇంటర్వ్యూలో శివన్ తెలిపారు.
"చంద్రయాన్-2 మిషన్కు సెప్టెంబర్ 7వ తేదీ ఎంతో ముఖ్యమైన రోజు. ఆ రోజు తెల్లవారుజామున ఒంటి గంట 40 నిమిషాలకు ల్యాండర్ చంద్రుడిపై దిగడం ప్రారంభమవుతుంది. 15 నిమిషాల్లో ఈ ప్రక్రియ అంతా ముగుస్తుంది. ఇది ఎంతో ముఖ్యం. ఎంతో క్లిష్టమైనది. సరికొత్త సాంకేతిక పరిజ్ఞానాన్ని వినియోగించాం. అంతా సక్రమంగా జరగేందుకు చర్యలు చేపట్టాం. అందరం సెప్టెంబర్ 7 కోసం ఎదురు చూస్తున్నాం."
-శివన్, ఇస్రో ఛైర్మన్.