చిదంబరం సీబీఐ కస్టడీ పొడిగింపు 'ఐఎన్ఎక్స్ మీడియా' అవినీతి కేసులో అరెస్టయిన చిదంబరం సీబీఐ కస్టడీ విచారణను మరో 4 రోజులు పొడిగించింది దిల్లీ రోస్ అవెన్యూ కోర్టు. పూర్తి దర్యాప్తు ఇంకా ముగియలేదని.. మరో 5 రోజులు రిమాండ్ను పొడిగించాలని దిల్లీ కోర్టును కోరింది సీబీఐ. దాదాపు 40 నిమిషాల పాటు.. సొలిసిటర్ జనరల్ తుషార్ మెహ్తా, అదనపు సొలిసిటర్ జనరల్ నటరాజన్లు కేంద్ర దర్యాప్తు సంస్థ తరఫున వాదనలు వినిపించారు.
అనంతరం దిల్లీ కోర్టు ప్రత్యేక న్యాయమూర్తి అజయ్ కుమార్.. చిదంబరం కస్టడీని మరో 4 రోజులు పొడిగిస్తూ తీర్పు వెలువరించారు. ఆగస్టు 30న తిరిగి కోర్టు ముందు హాజరుకానున్నారు కేంద్ర మాజీ ఆర్థిక మంత్రి. అప్పటివరకు చిదంబరాన్ని ప్రశ్నించనుంది సీబీఐ.
బెయిల్ పిటిషన్ తిరస్కరణ.. మధ్యంతర రక్షణ పొడిగింపు
ఐఎన్ఎక్స్ మీడియా కేసులో చిదంబరానికి ఈడీ అరెస్టు నుంచి మధ్యంతర రక్షణను రేపటివరకు పొడిగించింది సుప్రీం కోర్టు. నేడు అత్యున్నత న్యాయస్థానంలో చిదంబరం తరఫున వాదనలు ముగిశాయి. అనంతరం విచారణను ఆగస్టు 27కు వాయిదా వేసింది అత్యున్నత న్యాయస్థానం. ఎన్ఫోర్స్మెంట్ డైరెక్టరేట్ రేపు వాదనలు కొనసాగించనుంది.
అంతకుముందు కాంగ్రెస్ సీనియర్ నేతకు సుప్రీంకోర్టులో చుక్కెదురైంది. ఐఎన్ఎక్స్ మీడియా కేసులో తనకు ముందస్తు బెయిల్ నిరాకరిస్తూ దిల్లీ హైకోర్టు ఇచ్చిన తీర్పును సవాల్ చేస్తూ.. చిదంబరం దాఖలు చేసిన వ్యాజ్యంపై విచారణ చేపట్టేందుకు సుప్రీంకోర్టు తిరస్కరించింది. ఇప్పటికే అరెస్టయినందున విచారణ అర్థరహితమని కోర్టు పేర్కొంది.
కేంద్ర మాజీ ఆర్థిక మంత్రి తరఫున కాంగ్రెస్ సీనియర్ నేత, న్యాయవాది కపిల్ సిబల్.. ఈడీ తరఫున సొలిసిటర్ జనరల్ తుషార్ మెహ్తా వాదనలు వినిపించారు.
