భారత న్యాయవ్యవస్థను కాపాడండి: ఐబీఏహెచ్​ఆర్​ఐ

దిల్లీ అల్లర్లకు ముందు కొందరు భాజపా నేతలు రెచ్చగొట్టే ప్రసంగాలు చేసినా పోలీసులు స్పందించకపోవడాన్ని ప్రశ్నించిన దిల్లీ హైకోర్టు న్యాయమూర్తి జస్టిస్​ ఎస్. మురళీధర్​​ను కేంద్రం బదిలీ చేసింది. దీనిపై ఆందోళన వ్యక్తం చేస్తూ, తగిన చర్యలు తీసుకోవాలని అంతర్జాతీయ న్యాయవాదుల సంఘం రాష్ట్రపతి రామ్​నాథ్​ కోవింద్​కు లేఖ రాసింది.

కేంద్ర ప్రభుత్వం జస్టిస్ ఎస్​.మురళీధర్​ను దిల్లీ హైకోర్టు నుంచి పంజాబ్, హరియాణా హైకోర్టుకు బదిలీ చేయడంపై అంతర్జాతీయ బార్ అసోసియేషన్ మానవ హక్కుల సంఘం (ఐబీఏహెచ్​ఆర్​ఐ) ఆందోళన వ్యక్తం చేసింది. మోదీ ప్రభుత్వం తీసుకున్న తొందరపాటు నిర్ణయానికి వ్యతిరేకంగా చర్యలు తీసుకోవాలని విజ్ఞప్తి చేస్తూ రాష్ట్రపతి రామ్​నాథ్​ కోవింద్​కు బహిరంగ లేఖ రాసింది.

"జస్టిస్ ఎస్​.మురళీధర్​ను రాజకీయ ఒత్తిడి కారణంగా అసాధారణ రీతిలో బదిలీ చేశారు. దీని వల్ల భయంకరమైన సామాజిక అశాంతి నెలకొని... భారత న్యాయవ్యవస్థ స్వాతంత్ర్యాన్ని దెబ్బతీసే అవకాశం ఉంది. చట్టాల అమలు అనేది న్యాయవ్యవస్థ ప్రాథమిక విధి. దీనికి ప్రభుత్వం ఎలాంటి భంగం కలిగించకూడదు. ముఖ్యంగా దిల్లీ అల్లర్ల విషయంలో న్యాయమూర్తి తన సొంత స్వరాన్ని వినియోగించి పోలీసులను మందలించలేదు."- అంతర్జాతీయ బార్ అసోసియేషన్ మానవ హక్కుల సంఘం (ఐబీఏహెచ్​ఆర్​ఐ)

ప్రశ్నించిన ఒక్కరోజుకే

ఈశాన్య దిల్లీ అల్లర్లకు ముందు ద్వేషపూరిత ప్రసంగాలు చేశారనే ఆరోపణలు ఎదుర్కొంటున్న ముగ్గురు భాజపా నాయకులపై పోలీసులు ఎఫ్​ఐఆర్ నమోదు చేయడంలో విఫలమయ్యారు. దీనిపై జస్టిస్ ఎస్​.మురళీధర్​ అసహనం వ్యక్తం చేశారు. తక్షణం తగిన చర్యలు తీసుకోవాలని పోలీసులను ఆదేశించారు. ఇది జరిగిన ఒక్క రోజు తరువాత అంటే ఫిబ్రవరి 26 రాత్రి ఆయనను దిల్లీ హైకోర్టు నుంచి పంజాబ్​, హరియాణా హైకోర్టుకు బదిలీ చేసింది కేంద్ర ప్రభుత్వం.

'ఐబీఏహెచ్​ఆర్​ఐ' అనేది మానవ హక్కులను ప్రోత్సహించడానికి, రక్షించడానికి, అలాగే ప్రపంచవ్యాప్తంగా న్యాయ వృత్తి స్వాతంత్ర్యాన్ని కాపాడడానికి పనిచేసే న్యాయవాదుల సంఘం.

ఇదీ చూడండి:'ఎన్‌పీఆర్‌'కు ఏ పత్రమూ ఇవ్వక్కర్లేదు: షా