ఉగ్రవాదంపై ఉక్కుపాదం మోపగల సత్తా ప్రస్తుత ప్రభుత్వానికి ఉందన్నారు జాతీయ భద్రతా సలహాదారు అజిత్ డోభాల్. గురుగ్రామ్లో సీఆర్పీఎఫ్ 80వ వార్షికోత్సవ వేడుకలకు ముఖ్య అతిథిగా హాజరయ్యారు డోభాల్. పుల్వామా ఉగ్రదాడిలో ప్రాణాలు కోల్పోయిన జవాన్ల త్యాగాలను దేశం మరచిపోదన్నారు.
గతాన్ని తలచుకొని బాధపడకుండా వృత్తిధర్మాన్ని పెంపొందించుకుని శారీరక, మానసిక దృఢత్వంతో ముందుకు సాగాలని సీఆర్పీఎఫ్ జవాన్లకు సూచించారు.
అంతర్గత భద్రతా వ్యవస్థకు ముప్పు వాటిల్లినప్పుడు రాజ్యాంగ సంక్షోభం తలెత్తడం, ప్రభుత్వం కూలిపోవడం వంటి ఘటనలు చరిత్రలో చాలా జరిగాయని డోభాల్ గుర్తుచేశారు.
అతిపెద్ద అంతర్గత భద్రతా వ్యవస్థగా ఉన్న సీఆర్పీఎఫ్ శాంతి భద్రతల పరిరక్షణలో ప్రధాన పాత్ర పోషించాలని సూచించారు.
1939లో ఏర్పడిన సీఆర్పీఎఫ్ ప్రస్తుతం మూడు లక్షలకు పైగా సిబ్బందితో అతిపెద్ద అంతర్గత భద్రతా వ్యవస్థగా అవతరించింది. 1950లో దేశ తొలి హోంమంత్రి సర్ధార్ వల్లభాయ్ పటేల్ హయాంలో సీఆర్పీఎఫ్కు అధికారిక గుర్తింపు లభించింది.
పుల్వామా దాడికి పాక్పై ప్రతీకార చర్యగా భారత్ నిర్వహించిన వాయుసేన మెరుపు దాడుల వ్యూహరచనలో డోభాల్ కీలక పాత్ర పోషించారు.
సీఆర్పీఎఎఫ్ 80వ వార్షికోత్సవంలో మాట్లాడుతున్న డోభాల్ "మనం ఏం చేయాలి? మన కర్తవ్యం ఏంటి..?మన లక్ష్యమేంటి? ఏ విధంగా ముందుకు సాగాలి.. ఏ సయమంలో ప్రతిఘటించాలి.. వీటిపై సాహసోపేత నిర్ణయాలు తీసుకునే సత్తా ప్రస్తుత నాయకత్వానికి ఉంది. మీ మనోబలం దృఢంగా ఉంటే దేశ భవిష్యత్తు సురక్షితంగా ఉంటుంది. మీ వృత్తిధర్మానికి నేను నమస్కరిస్తున్నా.. "
-అజిత్ డోభాల్, జాతీయ భద్రతా సలహాదారు.
