'కరోనా కవచ్​' యాప్​తో మీ ఆరోగ్యం మరింత పదిలం!

కరోనాపై పోరులో భాగంగా 'కరోనా కవచ్'​ పేరుతో ఓ యాప్​ను రూపొందించింది కేంద్రం. ఈ యాప్​ బీటా వర్షన్​.. ఆండ్రాయిడ్​లో అందుబాటులో ఉంది. జీపీఎస్​ ఆధారంగా యూజర్లు వెళ్తున్న ప్రాంతాలను గుర్తించి.. కరోనా కేసులు డేటాతో పోల్చి.. వారిని హెచ్చరిస్తుంది ఈ యాప్.

కరోనా వైరస్​ నియంత్రణలో భాగంగా ఎలక్ట్రానిక్స్​ అండ్​ ఇన్ఫర్మేషన్ టెక్నాలజీ(ఎమ్​ఈఐటీవై) మంత్రిత్వ శాఖ ఓ యాప్​ను అందుబాటులోకి తీసుకొచ్చింది. దీనిద్వారా కరోనా సోకిన వారిని ట్రాక్​ చేయడమే కాకుండా.. వారిని కలిసిన వారినీ గుర్తుపట్టవచ్చని ఎమ్​ఆఐటీవై స్పష్టం చేసింది. ఈ 'కరోనా కవచ్​' యాప్​కు సంబంధించిన బీటా వర్షన్​ ప్రస్తుతం ఆండ్రాయిడ్​కు అందుబాటులో ఉంది. ఐఓఎస్​లోనూ యాప్​ తీసుకురావడం కోసం ఏర్పాట్లు జరుగుతున్నాయి.

యూజర్లు సందర్శించిన ప్రాంతాలను గుర్తించడానికి జీపీఎస్​ సహాయం తీసుకుంటుంది యాప్​. అనంతరం ఆ ప్రాంతంలో ఉన్న కరోనా పాజిటివ్​ కేసుల డేటాను పరిశీలిస్తుంది. ఒకవేళ ఏవైనా కేసులుంటే.. వెంటనే యూజర్​ను అప్రమత్తం చేస్తుంది.

ఆరోగ్యం పరంగా వివిధ రంగులతో పరిస్థితులను యాప్​ సూచిస్తుందిలా.

• గ్రీన్​- అంతా బాగుంది.
• బ్రౌన్​- వైద్యుడిని సంప్రదించండి.
• ఎల్లో- తక్షణమే క్వారంటైన్​ అవ్వండి.
• రెడ్​- కరోనా పాజిటివ్​ కేసు.

ఫోన్​ నంబరుతో లాగిన్...

ఈ యాప్​ను ఉపయోగించడానికి ముందుగా చరవాణి నంబరుతో లాగిన్ అవ్వాలి. కొవిడ్​-19 అనుమానితులను గుర్తించడమే ఈ యాప్​ ముఖ్య ఉద్దేశం. అయితే దీనిలో ప్రాథమిక సమాచారం మాత్రమే అందుబాటులో ఉంటుందని.. అలా కాకుండా మరింత సమాచారం ఉంటే బాగుంటుందని చాలా మంది అభిప్రాయపడుతున్నారు.

ప్రపంచ ఆరోగ్య సంస్థ కూడా త్వరలోనే ఓ యాప్​ను ఆవిష్కరించేందుకు ఏర్పాట్లు ముమ్మరం చేసింది.

ఇదీ చదవండి:ట్విట్టర్​లో మోదీ త్రీడీ యోగా క్లాసులు