సైన్యం చేతికి కొత్త రైఫిళ్లు- పాక్​కు ఇక చుక్కలే!

అధునాతన అమెరికన్​ సిగ్​ సావర్ రైఫిళ్లను భారత సైన్యం సమకూర్చుకుంది. మొదటి లాట్​గా వచ్చిన 10 వేల రైఫిళ్లను ప్రస్తుతం జమ్ముకశ్మీర్​లో విధులు నిర్వహిస్తున్న నార్తర్న్ కమాండ్​కు అందించారు. ఈ అధునాతన ఆయుధాల సాయంతో జమ్ము కశ్మీర్​లో ఉగ్రవాదులను అణచివేయడానికి, నియంత్రణ రేఖ వెంబడి పాక్ సైన్యాన్ని సమర్థంగా ఎదుర్కొనడానికి వీలవుతుంది.

భారత సైన్యం అధునాతన అమెరికన్ సిగ్​ సావర్ రైఫిళ్లను సమకూర్చుకుంది. జమ్ము కశ్మీర్​లో ఉగ్రవాదులను అణచివేయడానికి, నియంత్రణ రేఖ వెంబడి పాక్ సైన్యాన్ని సమర్థంగా ఎదుర్కొనడానికి వీటిని వినియోగించనుంది.

"మొదటి లాట్​ 10,000 సిగ్ 716 అసాల్ట్ రైఫిళ్లు భారత్​కు వచ్చాయి. వీటిని నార్తర్న్ కమాండ్​కు పంపించాం."
- భారత సైనిక వర్గాలు

జమ్ము కశ్మీర్, పీఓకేలో ఉగ్రవాద నిరోధక చర్యలను నార్తర్న్​ కమాండ్ చూసుకుంటుంది. ఇప్పుడు సైన్యం చేతికి అందిన అసాల్ట్ రైఫిళ్లతో పాక్​ ప్రేరేపిత ఉగ్రవాదులను, పాక్ సైన్యాన్ని సమర్థంగా ఎదుర్కోవడానికి వీలవుతుంది.

సిగ్​ సావర్​ ఎస్​ఐజీ 716 7.26X51 ఎమ్​ఎమ్​ రైఫిళ్లను భారత నిర్మిత 5.56X45 ఎమ్​ఎమ్​ ఇన్సాస్ స్థానంలో ప్రవేశపెట్టనున్నారు. వీటికి అదనంగా స్నైపర్ రైఫిళ్ల కోసం 21 లక్షల రౌండ్ల బుల్లెట్లకు కూడా భారత సైన్యం ఆర్డర్​ ఇచ్చింది.

భారీ ఒప్పందం..

72,400 కొత్త అసాల్ట్ రైఫిళ్ల కోసం భారత్​ సుమారు రూ.700 కోట్లు వెచ్చించి అమెరికాకు చెందిన ఆయుధ తయారీ సంస్థ సిగ్ సావర్​తో ఒప్పందం కుదుర్చుకుంది. ఈ రైఫిళ్లలో అధిక భాగం 66,000 భారత పదాతిదళం కోసం కేటాయించనున్నారు. నావికా దళానికి 2000, వైమానికిక దళానికి 4000 రైఫిళ్లు ఇవ్వనున్నారు.

భారత్​, రష్యా సంయుక్తంగా ఉత్పత్తి చేస్తున్న 7 లక్షలకుపైగా ఏకే 203 అసాల్ట్ రైఫిళ్లు కూడా అందుబాటులోకి వస్తే.. భారత సైన్యం శక్తి మరింత ఇనుమడిస్తుంది.

ఇదీ చూడండి: విద్యార్థినులపై వేధింపులు.. చితకబాదిన మహిళా కానిస్టేబుల్​