2022 కల్లా భారత అమ్ములపొదిలో తేజస్ 2.0 స్వదేశీ పరిజ్ఞానంతో భారత్ అభివృద్ధి చేసిన తేలకపాటి యుద్ధవిమానం 'తేజస్' కొత్త అవతారంలో రాబోతోంది. రెట్టించిన శక్తిసామర్థ్యాలతో 'తేజస్ మార్క్- 2' పేరుతో భారత 75వ స్వాతంత్ర్య వేడుకల నాటికి సిద్ధం కాబోతోంది. దీనితో దేశీయ ఆయుధ తయారీ సామర్థ్యం మరింత ఇనుమడించనుంది.
మార్-2 రూపకల్పన
తేజస్ మార్క్-2కు ఏరోనాటికల్ డెవలప్మెంట్ ఏజెన్సీ (ఏడీఏ) రూపకల్పన చేసింది. ఈ ప్రాజెక్టుకు 2009లో ఆమోదం లభించింది. దీనిని హిందూస్థాన్ ఏరోనాటిక్స్ లిమిటెడ్ (హెచ్ఏఎల్) ఉత్పత్తి చేస్తోంది. వీటి ఉత్పత్తి 2025-26 సంవత్సరంలో ప్రారంభమవుతుంది.
ఎఫ్-16 కన్నా..
ఈ తేజస్ పోరాట విమానం అమెరికాకు చెందిన ఎఫ్-16 కంటే శక్తిమంతమైంది. గగనతలంలో శత్రువుతో తలపడడంలో దీనికి తిరుగులేదు. తేజస్ మొదటి వెర్షన్ అన్ని పరీక్షలు పూర్తిచేసుకుని ఇప్పటికే భారత వైమానిక దళంలో చేరింది.
మార్క్ -2 శక్తి సామర్థ్యాలు
- మిరాజ్, జాగ్వార్ యుద్ధవిమానాల స్థాయి బరువుతో పాటు మరింత శక్తిమంతమైన జీఈ-414 ఇంజిన్ దీని సొంతం.
- సుదూరం నుంచి శత్రువుపైకి అస్త్రాలు ప్రయోగించే సామర్థ్యం.
- అధునాతన ఏఈఎస్ఏ రాడార్
- గగనతలంలోని లక్ష్యాలను ఛేదించేందుకు స్వదేశీ తయారీ 'అస్త్ర' క్షిపణి (దాదాపు 100 కి.మీ పరిధి)
- స్వదేశీ 'యాంటీ రేడియేషన్ క్షిపణి' (100 కి.మీ)
- భూతల లక్ష్యాల ఛేదనకు 'స్మార్ట్ యూంటీ ఎయిర్ ఫీల్డ్ వెపన్' (సా)
- శత్రు యుద్ధవిమానాల గమనాన్ని ముందే గుర్తించడానికి 'ఇన్ఫ్రారెడ్ సెర్చ్ అండ్ ట్రాక్' (ఐఆర్ఎస్టీ) సెన్సర్
- దూసుకొస్తున్న క్షిపణులను గుర్తించి, అప్రమత్తం చేయడానికి 'మిసైల్ అప్రోచ్ వార్నింగ్ సిస్టమ్' (ఎంఏడబ్ల్యూ ఎస్)
- మెరుగైన కాక్పిట్
