శాంతియుత దేశాల జాబితాలో భారత్ ర్యాంకు గతేడాది కంటే 5 స్థానాలు దిగువకు పడిపోయింది. 2019 ప్రపంచ శాంతి సూచి జాబితాలోని 163 దేశాల్లో భారత్ 141వ స్థానంలో నిలిచింది. గతేడాది 136వ ర్యాంకులో ఉంది. ఆస్ట్రేలియాకు చెందిన ఇన్‌స్టిట్యూట్‌ ఫర్‌ ఎకనమిక్స్‌ అండ్‌ పీస్‌ ఈ ర్యాంకులను ప్రకటించింది.
సమాజ భద్రత, భద్రత స్థాయి, దేశీయ, అంతర్జాతీయ విభేదాలు, సైనికీకరణ వంటి పలు అంశాలను ప్రామాణికంగా తీసుకుంది.
ప్రపంచంలో అత్యంత శాంతికాముక దేశంగా ఉన్న ఐస్లాండ్ మరోసారి అగ్రస్థానం సంపాదించింది. 2008 నుంచి ఈ దేశానిదే తొలిస్థానం కావడం గమనార్హం. అఫ్గానిస్థాన్ చివరి స్థానంలో నిలిచింది.
ప్రపంచ శాంతి సూచి జాబితాలో న్యూజిలాండ్, ఆస్ట్రియా, పోర్చుగల్‌, డెన్మార్క్‌లు వరుసగా ఐస్లాండ్ తర్వాతి స్ధానాల్లో నిలిచాయి.