కరోనాపై భారత్​ విజయం- మూడో వ్యక్తి డిశ్చార్జ్​

కేరళలో కలకలం సృష్టించిన మూడు కరోనా కేసులను వైద్యులు తమ చికిత్సతో నయం చేశారు. తాజాగా మూడో వ్యక్తిని ఆసుపత్రి నుంచి డిశ్చార్జ్​ చేశారు. ఫలితంగా కరోనాపై భారత్​ విజయం సాధించింది.

ప్రాణాంతక కరోనా వైరస్​పై పోరులో భారత్​ విజయం సాధించింది. దేశంలో నమోదైన మొత్తం మూడు కేసుల(కేరళ)కు వైద్యులు విజయవంతంగా చికిత్స చేశారు. వైరస్​ సోకిన తొలి వ్యక్తిని తాజాగా త్రిస్సూర్​ ఆసుపత్రి వైద్యులు డిశ్చార్జ్​ చేశారు.

వైద్య బోర్డు ఆధ్వర్యంలో ఆ వైద్య విద్యార్థిని ఆరోగ్య నివేదికలను పరిశీలించిన అనంతరం ఈ నిర్ణయం తీసుకున్నాయి ఆసుపత్రి వర్గాలు. కరోనా సోకిన మరో ఇద్దరిని (అలప్పుజ, కాసర్​గోడ్​) ఇప్పటికే ఆసుపత్రి నుంచి డిశ్చార్జ్​ చేశారు.

ఈ నెల మొదట్లో.. చైనా వుహాన్​ నుంచి వచ్చిన ఈ ముగ్గురికి వైరస్​ సోకినట్టు గుర్తించిన అధికారులు తక్షణమే తగిన చర్యలు చేపట్టారు. అనంతరం కరోనాను రాష్ట్ర విపత్తుగా ప్రకటించింది పినరయి విజయన్​ ప్రభుత్వం. ఇప్పటికీ 2 వేల 242 మంది వైద్య పరిశీలనలో ఉన్నారు.

ఇదీ చూడండి:-ఆశ్చర్యం: ఓ వైపు శస్త్రచికిత్స.. మరోవైపు వయోలిన్