రోదసిపై సొంత అంతరిక్ష కేంద్రం: ఇస్రో భారత అంతరిక్ష కేంద్రం ఇస్రో.. త్వరలో కీలక ప్రాజెక్టులు చేపట్టేందుకు సిద్ధమైంది. ఇప్పటికే చంద్రయాన్-2 ప్రయోగానికి ముహూర్తం ఖరారు చేసింది. జులై 15న అంతరిక్షంలోకి స్పేస్క్రాఫ్ట్(వాహక నౌక)ను పంపనుంది ఇస్రో.
రోదసిలో సొంతంగా అంతరిక్ష కేంద్రాన్ని ఏర్పాటు చేయాలని భావిస్తోంది ఇస్రో. ఈ విషయాన్ని స్వయంగా ఇస్రో ఛైర్మన్ కె.శివన్ విలేకరులకు వెల్లడించారు. ప్రతిష్టాత్మక గగన్యాన్ ప్రాజెక్టుకు కొనసాగింపుగా ఈ కార్యక్రమం ఉంటుందని పేర్కొన్నారు.
జులై 15న ప్రయోగించనున్న చంద్రయాన్-2 ప్రాజెక్టు.. చంద్రయాన్-1కు కొనసాగింపు అని అణుశక్తి, అంతరిక్ష శాఖ కేంద్ర సహాయ మంత్రి డా. జితేంద్ర సింగ్ తెలిపారు. సెప్టెంబర్లో లక్ష్యాన్ని చేరుతుందని వెల్లడించారు.
ఇదీ చూడండి:ఏఎన్-32 విమానంలో గల్లంతైన వారంతా మృతి
రోదసిపై తొలి మనిషిని పంపే ప్రతిష్టాత్మక కార్యక్రమానికి ఇస్రో నాంది పలకనున్నట్లు ప్రకటించారు జితేంద్ర సింగ్. పూర్తి స్వదేశీ సాంకేతిక పరిజ్ఞానంతో ఈ ప్రాజెక్టును నిర్వహించనున్నట్లు పేర్కొన్న ఆయన.. దీని కోసం రూ. 10 వేల కోట్లు వెచ్చించనున్నట్లు తెలిపారు.
''2022లో భారత 75వ స్వాతంత్ర్య దినోత్సవ వేడుకలను పురస్కరించుకొని.. అంతరిక్షంపైకి ఇస్రో తొలి మనిషిని పంపే కార్యక్రమం చేపట్టనుంది. 2022కు ముందు లేదా.. ఆ సంవత్సరంలోనే ప్రయోగం నిర్వహించే అవకాశముంది. ఈ ప్రాజెక్టులో ఇద్దరు లేదా ముగ్గురు వ్యోమగాములు ఉంటారు. దీని పర్యవేక్షణ కోసం.. ప్రత్యేక విభాగాన్ని ఏర్పాటు చేయనున్నాం. గగన్యాన్ జాతీయ సలహా మండలి విభాగం ఈ కార్యక్రమం ప్రణాళిక, ఏర్పాట్లను పర్యవేక్షిస్తుంది. ''
- జితేంద్ర సింగ్, అణు శక్తి, అంతరిక్ష శాఖ కేంద్ర సహాయ మంత్రి
