ద్వైపాక్షిక సంబంధాలను మెరుగుపర్చుకునే దిశగా భారత్, నేపాల్ కీలక నిర్ణయాలు తీసుకున్నాయి. సరిహద్దుల నిర్వహణ, ఆర్థిక రంగం, జల వనరులు, పర్యటక రంగంలో సహకారంపై ఇరు దేశాలు సమగ్ర సమీక్ష నిర్వహించాయి. భారత్-నేపాల్ జాయింట్ కమిషన్ 6వ సమావేశం(జేసీఎం)లో దిల్లీలోని హైదరాబాద్ హౌస్లో జరిగింది. ఈ భేటీలో నేపాల్ విదేశాంగ మంత్రి ప్రదీప్ కుమార్ గ్యవాలి, భారత విదేశాంగ మంత్రి జైశంకర్ పాల్గొన్నారు. కరోనా మహమ్మారిపై పోరులో భాగంగా.. కొవిషీల్డ్, కొవాగ్జిన్ టీకాలను అభివృద్ధి చేసినందుకు భారత్కు నేపాల్ అభినందనలు తెలిపింది. తమ దేశానికి ఈ టీకాలను సరఫరా చేయాలని కోరింది.
రైల్వేలైన్కు పచ్చజెండా..
భారత్-నేపాల్ ద్వైపాక్షిక సంబంధాలతో పాటు.. వాణిజ్యం, రవాణా, విద్యుత్తు, సరిహద్దు నిర్వహణ, కొవిడ్-19 సహకారం, మౌలిక సదుపాయాలు, కమ్యూనికేషన్, పెట్టుబడులు, వ్యవసాయం, పర్యటకం వంటి అంశాలపై ఈ భేటీలో చర్చించారు. పెట్రోలియం ఉత్పత్తుల పైప్లైన్ను నేపాల్లోని చిత్వాన్ వరకు పొడిగించడానికి ఇరు దేశాలు నిర్ణయానికి వచ్చాయి. సిలిగుడి నుంచి నేపాల్లోని ఝాపా వరకు మరో కొత్త పైప్లైన్ నిర్మాణానికి ఆమోదం తెలిపాయి. రక్సౌల్ నుంచి కాఠ్మాండుకు రైల్వేలైన్ నిర్మాణానికి పచ్చజెండా ఊపాయి. భైర్హావా ప్రాంతంలో త్వరలోనే ఇంటిగ్రేటెడ్ చెక్ పోస్టు నిర్మిస్తామని భారత్ తెలిపింది.
భారత్లోని లిపులేఖ్, కాలాపానీ, లింపియధురా ప్రాంతాలను కలుపుతూ గతేడాది నేపాల్ కొత్త మ్యాప్ను విడుదల చేసిన క్రమంలో ఇరు దేశాల మధ్య సంబంధాలు దెబ్బతిన్నాయి. ఆ వివాదం చెలరేగిన తరువాత నేపాల్ నుంచి ఓ సీనియర్ నేత భారత పర్యటనకు రావటం ఇదే తొలిసారి.
ఇదీ చూడండి:మరో ఐదుగురికి యూకే స్ట్రెయిన్ కరోనా
