'అణ్వాయుధ నిర్మూలనలో భారత్​ది​ కీలక పాత్ర'

అణ్వాయుధ నిర్మూలన, విస్తరణను అడ్డుకునే అంతర్జాతీయ ప్రయత్నాలను బలోపేతం చేయటంలో భారత్​ కీలక పాత్ర పోషిస్తుందన్నారు విదేశాంగ శాఖ కార్యదర్శి హర్షవర్ధన్​ ష్రింగ్లా. అణ్వాయుధ నిర్మూలన దినోత్సవం సందర్భంగా ఐరాస ఉన్నతస్థాయి సమావేశంలో కీలక వ్యాఖ్యలు చేశారు.

అణ్వాయుధ దేశాలపై వాటి వినియోగానికి చివరి ప్రాధాన్యం, అణ్వాయుధయేతర దేశాలపై అసలు వినియోగించకపోవటం అనే విధానాన్ని భారత్​ సమర్థిస్తుందన్నారు విదేశాంగ శాఖ కార్యదర్శి హర్షవర్ధన్​ ష్రింగ్లా. అణ్వాయుధ నిర్మూలన, విస్తరణను అడ్డుకునే అంతర్జాతీయ ప్రయత్నాలను బలోపేతం చేయటంలో భారత్​ కీలక భాగస్వామి అని పేర్కొన్నారు.

అణ్వాయుధాల నిర్మూలన దినోత్సవం సందర్భంగా ఐక్యరాజ్య సమితి ఉన్నతస్థాయి సమావేశంలో ఈ మేరకు వ్యాఖ్యానించారు ష్రింగ్లా.

"ప్రపంచంలోనే ఏకైక బహుపాక్షిక అణు నిరాయుధీకరణ చర్చలకు భారత్​ అధిక ప్రాధాన్యతనిస్తుంది. పూర్తిస్థాయిలో అణ్వాయుధాలను నిర్మూలించాలనే నిబద్ధతకు భారత్​ కట్టుబడి ఉంటుంది. అంతర్జాతీయ అంగీకారం మేరకు దశల వారీగా అణ్వాయుధ నిర్మూలన సాధించవచ్చనేది భారత్​ నమ్ముతుంది. అణ్వాయుధాలు కలిగిన దేశాల మధ్య నమ్మకం పెంచేందుకు సరైన చర్చలు అసవరం. అణ్వాయుధాలను వినియోగించటం అనేది ఐరాస నిబంధనలు ఉల్లంఘించటం సహా మానవత్వానికి వ్యతిరేకంగా నేరం చేయటమే."

- అనురాగ్​ ష్రింగ్లా, విదేశాంగ కార్యదర్శి.

2006లో ఐక్యరాజ్య సమితి సర్వసభ్య సమావేశం తొలి కమిటీ భేటీ, నిరాయుధీకరణపై 2007లో జరిగిన సమావేశానికి సమర్పించిన వర్కింగ్​ పేపర్లలో​ భారత​ వైఖరిని వెల్లడించినట్లు తెలిపారు ష్రింగ్లా.

అణ్వాయుధాల నిర్మూలన దినోత్సవం సందర్భంగా ఐక్యరాజ్య సమితి సాధారణ అసెంబ్లీ నిర్వహించిన ఉన్నతస్థాయి భేటీలో కరోనా కారణంగా చాలా మంది నేతలు ముందస్తుగా రికార్డు చేసిన వీడియో ద్వారా అణ్వాయుధాలు రహిత ప్రపంచం కోసం పిలుపునిచ్చారు.