'కొన్ని వారాల్లో వైరస్​పై విజయం మనదే'

కరోనాపై పోరులో భారత్​ ఎంతో మెరుగైన స్థితిలో ఉందన్నారు కేంద్ర ఆరోగ్యశాఖమంత్రి హర్షవర్ధన్​. ఇతర దేశాలతో పోల్చుకుంటే అన్ని విభాగాల్లోనూ ముందంజలో ఉన్నట్టు తెలిపారు. పరిస్థితి ఇలాగే కొనసాగితే ఇంకొన్ని వారాల్లో వైరస్​పై భారత్​ విజయం సాధిస్తుందని ధీమా వ్యక్తం చేశారు.

కరోనాపై పోరులో ఇతర దేశాలతో పోల్చుకుంటే భారత్​ మెరుగైన స్థితిలో ఉందని వెల్లడించారు కేంద్ర ఆరోగ్యమంత్రి హర్షవర్ధన్​. వైరస్​ను అరికట్టే దిశగా.. అన్ని విభాగాల్లోనూ దేశం ముందంజలో ఉందన్నారు. ఫలితంగా రానున్న కొద్ది వారాల్లో వైరస్​పై యుద్ధంలో విజయం సాధిస్తామని పేర్కొన్నారు.

నీతి ఆయోగ్​ ఆధ్వర్యంలో సామాజిక సంస్థలు, స్వచ్ఛంద సంస్థల్లో జరిగిన వీడియో కాన్ఫరెన్స్​లో ఈ వ్యాఖ్యలు చేశారు హర్షవర్ధన్. లాక్​డౌన్​ అమలైనప్పటి నుంచి ప్రజలకు నిత్యావసరాలు అందించడానికి ఎంతో కృషి చేశారని ఆయా సంస్థలను ప్రశంసించారు​. రానున్న రోజుల్లో ఎన్​జీఓల సహాయం ఎంతో ఉందని అభిప్రాయపడ్డారు.

దేశంలో ప్రస్తుతం ప్రతిరోజుకు 1.5లక్షల వ్యక్తిగత రక్షణ పరికరాలు(పీపీఈ) తయారవుతున్నట్టు పేర్కొన్నారు ఆరోగ్యమంత్రి.

కేసులు రెట్టింపు తీరు...

అమెరికా, స్పెయిన్​, ఇటలీ, బ్రిటన్​ వంటి దేశాలతో పోల్చుకుంటే.. కేసులు రెట్టింపవుతున్న తీరు భారత్​లో ఎంతో తక్కువగా ఉంది.

కేసులు రెట్టింపు అయ్యేందుకు పట్టిన రోజులు...

• 500-1000 - 5 రోజులు
• 1000- 2000 - 4 రోజులు
• 2000- 4000 - 3 రోజులు
• 4000- 8000 - 6 రోజులు
• 8000- 16,000 - 8 రోజులు
• 16,000- 32,000 - 10 రోజులు

అమెరికాలో కేసుల సంఖ్య 16వేల నుంచి 32వేలకు చేరడానికి రెండు రోజుల సమయం పట్టింది. ఇటలీ, బ్రిటన్​కు 5, స్పెయిన్​కు 4రోజుల సమయం పట్టింది.

మరణాల రేటులోనూ భారత్​ మెరుగైన స్థితిలో ఉంది.

మృతుల సంఖ్య - కేసులు

• 100 - 4,067
• 500 - 15,712
• 1000- 31, 332

అయితే మృతుల సంఖ్య 1000కి చేరే సరికి ఫ్రాన్స్​లో 22,304, ఇటలీలో 15,113, స్పెయిన్​లో 21,571, బ్రెజిల్​లో 19,789 కేసులున్నాయి.

ఇదీ చూడండి:-లాక్​డౌన్​ తర్వాత టైర్​-1 నగరాలకే విమాన సర్వీసులు!