స్విస్ బ్యాంక్​ నుంచి తొలి లిస్ట్- నల్లకుబేరులకు ఇక చిక్కులే!

స్విట్జర్లాండ్​లో ఉన్న భారత నల్లధనాన్ని వెనక్కి రప్పించే దిశగా మరో ముందడుగు పడింది. స్వయంచాలిత సమాచార మార్పిడి వ్యవస్థ ద్వారా ప్రస్తుతం వినియోగంలో ఉన్న ఖాతాలు, 2018లో మూసేసిన వాటి వివరాలను పంపించింది స్విస్. ఎన్ని ఖాతాలు  ఉన్నాయి, భారత ఖాతాదారుల మొత్తం నగదు వంటి  వివరాలు వెల్లడించేందుకు నిరాకరించింది.

నల్లధనం వెలికితీత దిశగా ముందడుగు వేసింది భారత్. స్విట్జర్లాండ్ బ్యాంకుల్లో నగదు దాచిన భారతీయ కుబేరుల వివరాల తొలి జాబితాను ఆ దేశం నుంచి కేంద్రం అందుకుంది. స్విస్​తో భారత ప్రభుత్వం కుదుర్చుకున్న ఒప్పందం మేరకు స్వయంచాలిత సమాచార మార్పిడి వ్యవస్థ అమల్లోకి వచ్చిన నేపథ్యంలో తొలి జాబితా దిల్లీ చేరింది.

స్విస్‌ బ్యాంకుల్లో.. నల్లధనం దాచుకున్న వారి వివరాలను ఆటోమెటిక్‌ విధానంలో భారత్ సహా 75 దేశాలు స్విట్జర్లాండ్‌ సమాఖ్య పన్ను విభాగం ద్వారా పొందుతున్నాయి. ఈ విధానంలో అక్కడి బ్యాంకుల్లో నగదు దాచుకున్న వారి వివరాలను భారత్ అందుకోవడం ఇదే తొలిసారి.

జాబితాలోని కొన్ని ఖాతాలు ఇంకా కొనసాగుతుండగా 2018లో మూసేసినవి కూడా ఉన్నాయని తెలుస్తోంది. తదుపరి ఖాతాల సమాచారం 2020 సెప్టెంబరులో భారత ప్రభుత్వానికి స్విస్‌ సర్కార్ పంపనుంది.

స్విస్ సర్కార్ పంపిన జాబితాలో ఖాతాదారుల పేరు, చిరునామా, లావాదేవీలు, పన్ను గుర్తింపు సంఖ్య, ఖాతాల్లో ఉన్న నిల్వ వంటి వివరాలుంటాయి.

వీటికి నిరాకరణ..

ఎన్ని ఖాతాల వివరాలు ఉన్నాయి, భారత ఖాతాదారుల మొత్తం నగదు వంటి వివరాలను చెప్పేందుకు స్విట్జర్లాండ్‌ ప్రభుత్వ పన్నుల విభాగం నిరాకరించింది. స్వయంచాలిత సమాచార మార్పిడి ద్వారా ఒప్పందం చేసుకున్న దేశాలకు 31లక్షల ఖాతాల వివరాలను పంపిన స్విట్జర్లాండ్ 24లక్షల ఖాతాల వివరాలను ఇతర దేశాల నుంచి అందుకుంది.

ఇదీ చూడండి: పొట్టి దుస్తుల యువతి పంచ్​కు 'మోరల్​ పోలీస్'​ పరార్​!