దశలవారీగా లాక్​డౌన్ ఎత్తివేత-​ సీఎంలతో మోదీ చర్చ

కరోనా వ్యాప్తితో దేశవ్యాప్తంగా నెలకొన్న పరిస్థితులపై చర్చించేందుకు అన్ని రాష్ట్రాల ముఖ్యమంత్రులతో సమావేశమయ్యారు ప్రధాని నరేంద్ర మోదీ. వీడియో కాన్ఫరెన్స్​ ద్వారా మాట్లాడిన ఆయన లాక్​డౌన్​ అమలు, కరోనా నివారణ చర్యలపై సీఎంలతో చర్చించారు.

దేశంలో రోజురోజుకు కొవిడ్​-19 వైరస్​ ఉద్ధృతి పెరుగుతున్న వేళ అన్ని రాష్ట్రాల ముఖ్యమంత్రులతో.. ప్రధాని నరేంద్ర మోదీ వీడియో కాన్ఫరెన్స్​ నిర్వహించారు. కరోనా కట్టడి, లాక్​డౌన్​ అమలు, ఆంక్షలపై చర్చించారు. మే 3 తర్వాత ఎలా ముందుకెళ్లాలనే అంశంపై సీఎంల అభిప్రాయాలు కోరారు ప్రధాని.

ఇప్పటికే దేశం సుదీర్ఘ దిగ్బంధంలో​ ఉన్న నేపథ్యంలో దశల వారీగా లాక్​డౌన్​ ఎత్తివేసే అంశంపై మోదీ.. సీఎంలతో చర్చించినట్లు అధికారిక వర్గాలు తెలిపాయి.

కరోనా నేపథ్యంలో.. తొలుత లాక్​డౌన్​కు ముందు మార్చి 22న తొలిసారి సీఎంలతో చర్చించిన ప్రధాని.. మార్చి 24న 21 రోజుల లాక్​డౌన్ అమలు చేస్తున్నట్లు​ ప్రకటించారు. అనంతరం.. ఏప్రిల్​ 11న మరోసారి వీడియో కాన్ఫరెన్స్​ నిర్వహించి లాక్​డౌన్​ను 19 రోజులు పొడిగించారు.

మరోసారి పొడిగింపు?

ఎఫ్‌ఆర్‌బీఎం పరిమితిని పెంచాలని, ఆర్థిక సాయం అంశాలను మోదీ వద్ద పలు రాష్ట్రాలు ప్రస్తావిస్తున్నట్టు తెలుస్తోంది. కొన్ని రాష్ట్రాలు లాక్​డౌన్​ను మరిన్ని రోజులు పొడిగించాలని కేంద్రాన్ని కోరనున్నట్లు తెలుస్తోంది. ఈ నేపథ్యంలో కేంద్రం ఎలాంటి నిర్ణయాలు తీసుకుంటుందో అనే అంశంపై ఉత్కంఠ నెలకొంది.

దేశంలో ఇప్పటివరకు 27,892 కరోనా పాజిటివ్‌ కేసులు నమోదు కాగా.. 872 మంది మృత్యువాతపడ్డారు.