ఆ బౌద్ధ వారసత్వ సంపద ధ్వంసంపై భారత్​ ఆందోళన

గిల్గిట్-బాల్టిస్థాన్‌లో బౌద్ధ వారసత్వ సంపద ధ్వంసమైందన్న వార్తలపై భారత్‌ ఆందోళన వ్యక్తం చేసింది. వారసత్వ సంపద విధ్వంసం చేయడంపై పాకిస్థాన్​కు నిరసన తెలిపింది భారత్‌. పాక్​ వెంటనే ఆ ప్రాంతాన్ని వీడాలని డిమాండ్​ చేసింది.

గిల్గిట్​-బాల్టిస్థాన్​లోని బౌద్ధ వారసత్వ సంపద ధ్వంసమైందన్న నివేదికలపై భారత్​ తన ఆందోళనను పాకిస్థాన్​కు వెల్లడించింది. ప్రాచీన నాగరికత, సాంస్కృతిక వారసత్వంపై ధిక్కార ధోరణి సరికాదని, దీనిని తీవ్రంగా ఖండిస్తున్నామని భారత విదేశాంగశాఖ ప్రతినిధి అనురాగ్​ శ్రీవాస్తవా పేర్కొన్నారు.

"పాక్​ అక్రమంగా ఆక్రమించిన భారత భూభాగంలోని గిల్గిట్​-బాల్టిస్థాన్​లో అమూల్యమైన బౌద్ధ వారసత్వ సంపదను ధ్వంసం చేయడంపై మేము తీవ్ర నిరసన వ్యక్తం చేస్తున్నాం. ఇలాంటి దుశ్చర్యలను ఖండిస్తున్నాం."

-అనురాగ్​ శ్రీవాస్తవా, భారత విదేశాంగశాఖ ప్రతినిధి

అమూల్యమైన పురావస్తు వారసత్వాన్ని పునరుద్ధరించడానికి, పరిరక్షించడానికి ఆ ప్రాంతంలోకి భారత నిపుణులను తక్షణమే అనుమతించాలని కోరినట్టు శ్రీవాస్తవా స్పష్టం చేశారు.

పాకిస్థాన్​ అక్రమంగా ఆక్రమించుకున్న ప్రాంతాన్ని వెంటనే ఖాళీ చేయాలని భారత్​ డిమాండ్​ చేస్తున్నట్టు శ్రీవాస్తవా తెలిపారు. మత, సాంస్కృతిక హక్కులు, స్వేచ్ఛలను దెబ్బతీయడం తీవ్ర ఆందోళన కలిగించే విషయమని శ్రీవాస్తవ పర్కొన్నారు.

ఇదీ చూడండి:3 గంటలు.. 2 రాష్ట్రాలు.. నిసర్గ తుపాను విలయం