'డీఆర్డీఓ ప్రయోగాలను రహస్యంగా ఉంచలేం' మిషన్ శక్తి ప్రయోగాన్ని అత్యంత దిగువ కక్ష్య అయిన 300 కిలో మీటర్ల ఎత్తులోనే చేపట్టామని డీఆర్డీఓ ఛైర్మన్ సతీశ్ రెడ్డి వెల్లడించారు. 1000 కిలో మీటర్ల ఎత్తులో ఈ ప్రయోగం నిర్వహించే వీలున్నా ... అంతరిక్ష వ్యర్థాల నుంచి వచ్చే ప్రమాదాలను తగ్గించేందుకు కావాలనే ఈ కక్ష్యను ఎంచుకున్నట్లు తెలిపారు.
మార్చి 27న భారత్ విజయవంతంగా ఉపగ్రహ విధ్వంసక క్షిపణి ప్రయోగాన్ని నిర్వహించిన తర్వాత అంతరిక్ష వ్యర్థాల గురించి నాసా చేసిన వాఖ్యలపై ఆయన ఈ సమాధానమిచ్చారు.
దీని ద్వారా ఉత్పన్నమైన అంతరిక్ష వ్యర్థాలు కేవలం కొన్ని వారాల్లోనే నాశనమవుతాయని పేర్కొన్నారు. ఫలితంగా.. అంతరిక్ష కేంద్రం సహా ప్రపంచ దేశాల శాటిలైట్లకు ఎలాంటి ప్రమాదం ఉండదని పేర్కొన్నారు.
ప్రయోగానికి అవసరమైన అన్నిరకాల అనుమతులు, జాగ్రత్తలు తీసుకునే ఈ ప్రయోగాన్ని నిర్వహించినట్లు ఆయన తెలిపారు.
మిషన్ శక్తి వంటి ప్రయోగాలను చేపట్టి... ఆ విషయాలను బహిర్గతం చేయడాన్ని కేంద్ర మాజీ మంత్రి చిదంబరం తప్పుబట్టారు. దీనిపై స్పందించిన సతీశ్ రెడ్డి ఇలాంటి ప్రయోగాలు చేసిన తర్వాత వాటిని రహస్యంగా ఉంచడం వీలుకాదని పేర్కొన్నారు.
"ఈ విధమైన మిషన్ల ప్రయోగాలు నిర్వహించిన తర్వాత రహస్యంగా ఉంచడం వీలుకాదు. ఇంతకు ముందు ఈ ప్రయోగాన్ని నిర్వహించి అమెరికా, చైనా వంటి దేశాలు కూడా ప్రజల దృష్టికి తెచ్చాయి. ఎందుకంటే ఈ శాటిలైట్ను ప్రపంచవ్యాప్తంగా ఉన్న అంతరిక్ష కేంద్రాల్లో చాలా మంది గుర్తించారు"
- సతీశ్ రెడ్డి, డీఆర్డీఓ ఛైర్మన్
భారత్ మిషన్ శక్తి ప్రయోగంతో... భూమి నుంచి నిర్దేశిత కక్ష్యలో ఉన్న శాటిలైట్ను విజయవంతంగా పేల్చి... ఈ సాంకేతికత ఉన్న అతి కొద్ది దేశాల సరసన భారత్ నిలిచింది. ఏ- శాట్ ప్రయోగంపై ప్రధాని నరేంద్రమోదీ హర్షం వ్యక్తం చేశారు. అంతరిక్ష రంగంలో భారత్.. తన సత్తా చాటిందని కీర్తించారు.
ఇదీ చూడండి:భారత్ భేరి: భాజపా దూసుకెళ్తోంది కానీ...
