ఆ ప్రాంతాల నుంచి వెనక్కిమళ్లిన భారత్​-చైనా బలగాలు

పెట్రోలింగ్​​ పాయింట్​ 15, గల్వాన్​ లోయ, హాట్​ స్ప్రింగ్స్​/గోగ్రా ప్రాంతాల నుంచి భారత్​-చైనా దేశాలు తమ బలగాలను ఉపసంహరించుకున్నట్టు తెలుస్తోంది. సరిహద్దు ఉద్రిక్తతలను తగ్గించేందుకు ఇరు దేశాల మధ్య జరుగుతున్న చర్చల నేపథ్యంలో బలగాల ఉపసంహరణకు ప్రాధాన్యం సంతరించుకుంది.

సరిహద్దు ఉద్రిక్తతలను తగ్గించే అంశంలో భారత్​-చైనాలు కీలక పురోగతి సాధించాయి. తూర్పు లద్దాఖ్​లోని గల్వాన్​ లోయ, పెట్రోలింగ్​​ పాయింట్​ 15, హాట్​ స్ప్రింగ్స్/గోగ్రా​ వద్ద బలగాల ఉపసంహరణను ఇరు దేశాలు పూర్తి చేసినట్టు సైనిక అధికారుల సమాచారం.

"భారత్​-చైనా మధ్య మిలిటరీ, దౌత్యస్థాయిలో జరుగుతున్న చర్చలు సఫలం అయ్యాయి. తూర్పు లద్దాఖ్​లోని పెట్రోలింగ్​​ పాయింట్​ 14(గల్వాన్​ లోయ), పెట్రోలింగ్​​ పాయింట్​15, 17ఏ(హాట్​ స్ప్రింగ్స్​/గోగ్రా)లో ఇరు దేశాలు తమ బలగాలను ఉపసంహరించుకున్నాయి."

--- భారత సైనికాధికారి.

గత కార్ప్స్​ కమాండర్ల స్థాయిలో జరిగిన చర్చల్లో అంగీకరించినట్టుగానే బలగాలు వెనుదిరిగాయి. దీంతో ఇక ఒక్క పాంగ్యాంగ్​ ట్సో వద్ద ఉన్న ఫింగర్​ పాయింట్​ నుంచి మాత్రమే బలగాలు వెనుదిరగాల్సి ఉంది. దీనిపై వచ్చే వారంలో మిలిటరీ కమాండర్ల స్థాయిలో సమావేశం జరిగే అవకాశముంది.

అయితే ఇరువైపులా బలగాల ఉపసంహరణ జరుగుతున్నప్పటికీ.. తూర్పు లద్దాఖ్​లోని వాస్తవాధీన రేఖ వెంబడి చైనా తాజాగా మరో 40వేల మంది సైనికులను మోహరించడం ఆందోళన కలిగించే విషయం.

ఇదీ చూడండి:-చైనాను ఎదుర్కొవడానికి భారత్​ దౌత్య అస్త్రం!