కరోనా వైరస్ విజృంభణను కట్టడి చేసే టీకా డోసులను సొంతం చేసుకునే విషయంలో భారత్ అతి పెద్ద కొనుగోలుదారుగా అవతరించింది. మన దేశం ఇప్పటివరకు 1600 మిలియన్ల టీకా డోసులను కొనుగోలు చేసేందుకు ఒప్పందాలు చేసుకుందని అమెరికా‌కు చెందిన డ్యూక్ విశ్వవిద్యాలయం విడుదల చేసిన 'లాంచ్‌ అండ్ స్కేల్ స్పీడ్‌ మీటర్' నివేదిక వెల్లడిస్తోంది. ఈ మొత్తం డోసులు దేశ జనాభాలో 60 శాతం మందికి సరిపోతాయని విశ్లేషకులు అంటున్నారు. ఈ జాబితాలో దాదాపు 1600 మిలియన్ల డోసులతో యూరోపియన్ యూనియన్ రెండో స్థానంలో నిలవగా, 1000 మిలియన్ల డోసులతో అమెరికా మూడో స్థానంలో ఉందని తెలిపింది.
టీకా కొనుగోళ్ల విషయంలో వివిధ దేశాలు ఎదుర్కొనే సవాళ్లను గుర్తించే లక్ష్యంతో నవంబర్‌ 30వరకు లభ్యమైన టీకా సేకరణ, తయారీకి సంబంధించిన సమాచారాన్ని ఈ నివేదిక పేర్కొంది. టీకా తయారీ సామర్థ్యం మెరుగ్గా ఉన్న భారత్, బ్రెజిల్ వంటి దేశాలు టీకా అభివృద్ధి సంస్థలతో ఒప్పందాలు చేసుకోవడంలో విజయవంతమయ్యాయని వెల్లడించింది. అయితే జపాన్, కెనడా, యూకే వంటి దేశాలు ఇప్పటివరకు 400 మిలియన్ల కంటే తక్కువ టీకా డోసులనే కొనుగోలు చేశాయని తెలిపింది.