ఇమ్రాన్​ 'పౌర' వ్యాఖ్యలపై భారత్​ ఘాటు స్పందన

పౌరసత్వ చట్ట సవరణ కారణంగా లక్షలాది మంది ముస్లింలు భారత్​ను వదిలి వెళ్లే అవకాశం ఉందని పాక్ ప్రధాని చేసిన వ్యాఖ్యలపై భారత్ ఘాటుగా స్పందించింది. పాకిస్థాన్ మరోసారి అసత్యాలను వ్యాపింపజేస్తూ హింసను ప్రేరేపిస్తోందని భారత విదేశాంగ శాఖ తెలిపింది. ముందు తమ దేశంలోని మైనారిటీల హక్కుల రక్షణపై దృష్టి సారించాలని పాక్​కు సూచించింది.

కేంద్రం తీసుకొచ్చిన పౌరసత్వ చట్ట సవరణ సహా కశ్మీర్​లో నెలకొన్న పరిస్థితుల కారణంగా లక్షలాదిమంది ముస్లింలు భారత్​ను విడిచివెళ్లే అవకాశం ఉందన్న పాకిస్థాన్​ ప్రధాని ఇమ్రాన్​ ఖాన్​ వ్యాఖ్యలను భారత్ ఖండించింది. ప్రపంచ శరణార్థుల సమావేశంలో భాగంగా ఇమ్రాన్​ చేసిన ఈ వ్యాఖ్యలపై స్పందించిన భారత విదేశాంగశాఖ ప్రతినిధి రవీశ్​ కుమార్... పాక్ మరోసారి అసత్యాలను వ్యాపింపజేయడానికి ప్రయత్నిస్తోందన్నారు. పూర్తిగా భారత అంతర్గత విషయమైన అంశాలను అంతర్జాతీయ వేదికల్లో లేవనెత్తడం సరికాదని స్పష్టం చేశారు.

"ప్రపంచ వేదికలపై పాక్​ మరోసారి తనకు అలవాటున్న విధంగానే నిందలు మోపుతోందనే విషయం ప్రపంచ దేశాలకు ఇప్పుడు స్పష్టమైంది. పాక్​ చేస్తున్న చర్యలు ఆ దేశ చుట్టుపక్కల ఉన్న దేశాలపై తీవ్ర విఘాతం కలిగిస్తుండటం దురదృష్టకరం."-రవీశ్ కుమార్, భారత విదేశాంగ ప్రతినిధి.

'మీ దేశంపై దృష్టిపెట్టండి'

గత 72 ఏళ్లుగా తమ దేశంలోని మైనారిటీలను పాకిస్థాన్ పీడిస్తూనే ఉందని అన్నారు రవీశ్. వారందరు భారత్​లో ఆశ్రయం పొందే స్థితి ఏర్పడిందని వ్యాఖ్యానించారు. 1971 తూర్పు పాకిస్థాన్​లో ఆ దేశ సైన్యం చేసిన దురాగతాలను ఇమ్రాన్ మర్చిపోయి మాట్లాడుతున్నారని మండిపడ్డారు. ముందు పాక్​లోని మైనారిటీల హక్కుల రక్షణపై దృష్టిపెట్టాలని సూచించారు.

ఇమ్రాన్ ఏమన్నారంటే...

ఐక్యరాజ్యసమితి మానవహక్కుల మండలి, ఐరాస శరణార్థుల ఏజెన్సీ, స్విట్జర్లాండ్ ప్రభుత్వం సంయుక్తంగా ఏర్పాటు చేసిన ప్రపంచ శరణార్థుల వేదికపై పాక్ ప్రధాని ఇమ్రాన్ ఖాన్.. భారత్​లో నెలకొన్న పరిస్థితులపై వ్యాఖ్యలు చేశారు. భారత్​లో విధించిన కర్ఫ్యూల కారణంగా లక్షలాది మంది దేశాన్ని విడిచివెళ్లే ప్రమాదం ఉందన్నారు. శరణార్థుల సంక్షోభం తలెత్తుతుందని, ఇది రెండు అణ్వాయుధ దేశాల మధ్య సంఘర్షణకు దారితీస్తుందని వ్యాఖ్యానించారు.