రఫేల్ యుద్ధ విమానాల కొనుగోలు ఒప్పందంపై ఇచ్చిన తీర్పును సమీక్షించాలంటూ దాఖలైన వ్యాజ్యాలను సుప్రీంకోర్టు నేడు విచారించనుంది. రఫేల్ ఒప్పందంపై డిసెంబర్ 14న ఇచ్చిన తీర్పును సమీక్షించాలని మాజీ కేంద్ర మంత్రులు యశ్వంత్ సిన్హా, అరుణ్ శౌరి, న్యాయవాది ప్రశాంత్ భూషణ్ పిటిషన్లు వేశారు. ఇప్పటికే ఇందుకు సంబంధించి కేంద్ర ప్రభుత్వం, పిటిషనర్లు అత్యున్నత న్యాయస్థానంలో ప్రమాణపత్రాలు దాఖలు చేశారు.
రఫేల్ యుద్ధ విమానాల కొనుగోలు విషయంలో సుప్రీంకోర్టుకు కేంద్రం అసత్య సమాచారాన్ని సమర్పించిందని పిటిషనర్లు ప్రమాణపత్రంలో ఆరోపించారు. దీనిపై కేంద్రం స్పందించింది. పిటిషనర్లే కోర్టును తప్పుదోవ పట్టిస్తున్నారని ప్రమాణపత్రం దాఖలు చేసింది. మీడియా కథనాలు, అసంపూర్ణ సమాచారాల ఆధారంగా వ్యాజ్యాలు వేశారని విమర్శించింది.
ఇదీ చూడండి : 'కేంద్రం తప్పుదోవ పట్టించింది..' 'కాదు పిటిషనర్లే!'
రాహుల్ 'ధిక్కరణ'పై విచారణ
కాంగ్రెస్ అధ్యక్షుడు రాహుల్ గాంధీపై దాఖలైన కోర్టు ధిక్కరణ పిటిషన్ను నేడు విచారించనుంది సుప్రీంకోర్టు. 'చౌకీదార్‌ చోర్‌' వ్యాఖ్యలను సుప్రీంకోర్టుకు తప్పుగా ఆపాదించినందుకు కాంగ్రెస్ అధ్యక్షుడు రాహుల్‌గాంధీ సర్వోన్నత న్యాయస్థానానికి ఇప్పటికే బేషరతు క్షమాపణలు చెప్పారు. తాను ఈ వ్యాఖ్యలను ఉద్దేశపూర్వకంగా చేయలేదని పేర్కొంటూ ప్రమాణపత్రాలు దాఖలు చేశారు.