మహారాష్ట్రలో మళ్లీ వరుణుడి బీభత్సం

ఇటీవల మహారాష్ట్రను అతలాకుతలం చేసిన వరుణుడు మళ్లీ విజృంభించాడు. భారీ వర్షాల కారణంగా ముంబయి సహా పలు ప్రాంతాలు జలమయమయ్యాయి. కుండపోత వర్షానికి రోడ్లన్నీ నీట మునిగి ప్రయాణికులు అవస్థలు పడుతున్నారు. మరో రెండు రోజుల పాటు వర్షాలు కొనసాగే అవకాశం ఉందని వాతావరణ శాఖ హెచ్చరించింది.

కొద్దివారాల క్రితం ముంబయిలో వరుణుడు బీభత్సం సృష్టించాడు. ఆ ఘటన నుంచి కోలుకోకముందే మళ్లీ వర్షాలు విజృంభిస్తున్నాయి. కుండపోత వర్షానికి నగరంలోని అనేక ప్రాంతాలు జలమయమయ్యాయి.

ముంబయిలోని మెట్రోపాలిటన్​ ప్రాంతాల్లో గడిచిన 24 గంటల్లో 100 నుంచి 200 మిల్లీమీటర్ల వర్షపాతం నమోదైంది. నాలా సోపారాలో కుండపోత వర్షాల వల్ల మోకాళ్ల లోతు నీరు చేరింది. మరోవైపు భారీ వర్షాలు కురవడం వల్ల పలు చోట్ల రైలు పట్టాలు నీటమునిగాయి. పలు రైళ్ల సమయవేళల్లో మార్పులు చేశారు. రాకపోకలకు తీవ్ర అంతరాయం ఏర్పడింది.

కింగ్​ సర్కిల్​, గాంధీ మార్కెట్​ సమీపంలో పెద్ద ఎత్తున వరద నీరు నిలిచింది. రోడ్లన్నీ జలదిగ్బంధం అవడంతో ప్రయాణికులు అవస్థలు పడుతున్నారు. మరో రెండు రోజుల పాటు భారీ వర్షాలు కురిసే అవకాశం ఉందని వాతావణ శాఖ హెచ్చరించింది. ఠాణే, పోల్ఘర్​ సహా పలు ప్రాంతాల్లో రెడ్​ అలర్ట్​ ప్రకటించారు అధికారులు. ముందు జాగ్రత్తగా ముంబయిలో పాఠశాలలకు నేడు సెలవు ప్రకటించారు.

ఇదీ చూడండి:డీకే అరెస్టుకు నిరసనగా కర్ణాటకలో ఆందోళనలు