ఇకపై వంట నూనెతోనూ కార్లు నడపొచ్చు..!

ఉత్తరాఖండ్​లోని ఓ పరిశోధకుడు రోజూ వాడే వంట నూనె నుంచి డీజిల్​ను తయారు చేశారు. నూతన సాంకేతికతను ఉపయోగించి ఇలాంటి ఆవిష్కరణకు శ్రీకారం చుట్టారు. ప్రయోగాత్మకంగా పరిశీలిస్తున్న ఈ ప్రక్రియ విజయవంతమైతే ప్లాంట్​ ఏర్పాటు చేయనున్నట్లు తెలిపారు శాస్త్రవేత్త నీరజ్​. ఫలితంగా.. ఇకపై వంటనూనెతో తయారైన డీజిల్​తోనూ కార్లు రోడ్లపై పరుగులు పెట్టే అవకాశముంది.

మీ ఇంట్లో వాడే వంట నూనెను డీజిల్​గా మార్చుకోవచ్చు అంటే నమ్మగలరా... అవును.. దీనిని నిజం చేశారు ఉత్తరాఖండ్​ దేహ్రాదూన్​లోని ఓ పరిశోధకుడు. వంట​ నూనె నుంచి డీజిల్​ను ఉత్పత్తి చేశారు. ఇండియన్​ ఇన్​స్టిట్యూట్​ ఆఫ్​ పెట్రోలియమ్​(ఐఐపీ) సంస్థ ప్రధాన శాస్త్రవేత్త నీరజ్​ ఈ ఆవిష్కరణకు పూనుకున్నారు.

సాంకేతికతను జోడించి ఇన్​స్టిట్యూట్​ మెస్​లో మిగిలిపోయిన వంటనూనె వ్యర్థాలను సేకరించి వాటి నుంచి డీజిల్​ను ఉత్పత్తి చేశారు నీరజ్​​. ప్రస్తుతం ఐఐపీలో దీనిని ప్రయోగాత్మకంగా పరిశీలిస్తున్నారు. ఇది విజయవంతమైతే... దేహ్రాదూన్​లో మొదటి ప్లాంట్​ను ఏర్పాటు చేయనున్నట్లు తెలిపారు. 2020 మార్చి నుంచి ప్లాంట్​లో ఉత్పత్తి ప్రక్రియ అందుబాటులోకి వచ్చే అవకాశముంది.

''భారతదేశంలో 20 నుండి 25 మిలియన్ టన్నుల వంట నూనెను ఉపయోగిస్తున్నారు. ఇందులో 5 శాతం వంట నూనెను డీజిల్‌గా మార్చడానికి ఉపయోగిస్తే, ముడి చమురు దిగుమతిలో ఎక్కువ భాగాన్ని తగ్గించవచ్చు. 8 సంవత్సరాల నుంచి దీనిపై పరిశోధన చేస్తున్నాం. 2015లో పేటెంట్ రైట్స్​ కోసం దరఖాస్తు చేసుకున్నాం. 2018లో మంజూరైంది. మొదటి ప్లాంట్​ రాయ్​పూర్​లో ఏర్పాటు చేస్తాం. ఇండియన్​ ఆర్మీ, నేవీలో వీటికి మంచి డిమాండ్​ ఉంది.''

-నీరజ్​​, పరిశోధకుడు, ఐఐపీ శాస్త్రవేత్త​

డీజిల్​ ఎలా తయారు చేస్తారంటే..

సేకరించిన వంటనూనె నుంచి వ్యర్థాలను వేరు చేస్తారు. ఆపై మిథనాల్​ ద్రావకాన్ని సోడా(సోడియం కార్బోనేట్​) ఉత్ప్రేరకంతో కలుపుతారు. ఆ రెండింటి మిశ్రమాలను వేరు చేసిన వంటనూనెతో జత చేస్తారు. అప్పుడు నూనె, మిథనాల్​ మిశ్రమం రెండు పొరలుగా విడిపోతుంది. ఈ మొత్తం మిశ్రమాన్ని 65 డిగ్రీల ఉష్ణోగ్రత వద్ద 3 నుంచి 4 గంటల పాటు వేడి చేస్తారు. ఐఐపీ తయారు చేసిన పేటెంట్​ మిశ్రమాన్ని ఇందులో ఒక నిమిషం కన్నా తక్కువ సమయం పాటు కలుపుతారు.

అలా రసాయన చర్యలు జరిగి బయో డీజిల్​, గ్లిసరాల్​ రెండూ 15 నిమిషాల్లో వేరవుతాయి. ఈ మొత్తం ప్రక్రియ పూర్తవడానికి 1 నుంచి 2 గంటల సమయం పడుతుంది. బయో డీజిల్​ పై భాగానికి, గ్లిసరాల్​ అడుగుకు చేరుతుంది. ఇందులో ఉన్న గ్లిసరాల్​ మిశ్రమాన్ని మరింత మెరుగుపరిచి సబ్బు ఇతర సంబంధిత పరిశ్రమలలో ఉపయోగించేందుకు పంపిస్తారు. ఇక డీజిల్​ను నేరుగా ఉపయోగించుకోవచ్చు. దీనిని సాధారణంగా వాహనాల్లో వాడే ఇంధనంగా ఉపయోగించుకోవచ్చు.

ఇదీ చూడండి: 'సమాజంపై పగ' పేరుతో పిల్లలపై రసాయన దాడి