రఫేల్​ దళంలోకి త్వరలో మహిళా పైలెట్​

రఫేల్​​ యుద్ధ విమానాలను నడిపే పైలెట్​గా ఓ మహిళ ఎంపికయ్యారు. ప్రస్తుతం శిక్షణ పొందుతున్న ఆమె... త్వరలోనే అంబాలా వేదికగా విధులు నిర్వర్తించనున్నారు.

భారత వైమానిక దళానికి చెందిన ఓ మహిళా పైలెట్​కు అరుదైన అవకాశం దక్కింది. ప్రతిష్టాత్మక రఫేల్​ యుద్ధ విమానం నడిపేందుకు ఆమె ఎంపికయ్యారు. త్వరలో అంబాలాలోని 17వ స్క్వాడ్రన్​ గోల్డెన్​ యారోస్ వైమానిక స్థావరంలో ఆమె విధుల్లో చేరనున్నట్లు అధికారిక వర్గాలు తెలిపాయి.

ఆ మహిళా పైలెట్ ప్రస్తుతం రఫేల్​ యుద్ధ విమానం నడిపేందుకు శిక్షణ పొందుతున్నట్లు అధికారులు వెల్లడించారు. అంతకుముందు ఆమె మిగ్ -21 యుద్ధ విమానానికి పైలెట్ అని.. అంతర్గతంగా జరిగిన పరీక్షల ద్వారా ఎంపికయ్యారని వివరించారు .

ప్రస్తుతం భారత వైమానిక దళంలో 10 మంది మహిళా ఫైటర్ పైలెట్లు, 18 మంది మహిళా నావిగేటర్లు ఉన్నారు. అన్ని విభాగాల్లో కలిపి మొత్తం మహిళా అధికారులు 1,875 మంది ఉన్నారు.

సెప్టెంబరు 10న ఐదు రఫేల్​ యుద్ధ విమానాలు భారత వైమానిక దళంలో చేరాయి. మరో నాలుగైదు జెట్లతో కూడిన రెండో బ్యాచ్ నవంబర్ నాటికి భారత్​కు వచ్చే అవకాశం ఉంది.